شیوسینا رہنما سنجے راوت اور مہاراشٹر کے سابق وزیر اعلیٰ اور بی جے پی کے رہنما دیوندر فڑنویس سے ایک ہوٹل میں ملاقات کی جس کے بعد سیاست تیز ہوگئی ہے۔
وہیں سنجے راوت نے صفائی دیتے ہوئے کہا کہ میں نے کل دیویندر فڑنویس سے ملاقات کی جس میں کچھ مسائل پر تبادلہ خیال کیا گیا۔
انہوں نے کہا کہ ہماری میٹنگ طے تھی، کیوں کہ میں سامنا کے لیے کووڈ 19 اور دیگر مسائل سے متعلق انٹرویو لینا چاہتا تھا۔
انہوں نے مزید کہا کہ ہمارے درمیان نظریاتی اختلافات ہوسکتے ہیں، لیکن ہم دشمن نہیں ہیں، اور وزیر اعلی ادھو ٹھاکرے بھی ہماری ملاقات سے واقف تھے۔ہم کسی بنکر پر نہیں بیٹھے تھے یہ ایک کھلی میٹنگ تھی ۔
واضح رہے کہ گزشتہ برس نومبر میں شیوسینا نے این ڈی اے سے علیحدگی اختیار کی تھی، اور کانگریس ، نیشنلسٹ کانگریس پارٹی کے ساتھ مل کر مہاراشٹر میں حکومت تشکیل دی جس کے وزیر اعلی ادھو ٹھاکرے بنے۔
شیوسینا کے سینیئر رہنما سنجے راوت نے ٹوئٹ کرتے ہوئے کہا کہ این ڈی اے کے مضبوط ستون شیوسینا اور اکالی دل تھے۔
شیو سینا کے سینئر رہنما سنجے راوت نے شرومنی اکالی دل کے قومی جمہوری اتحاد(این ڈی اے) سے ناطہ توڑنے کے بعد ٹوئٹ کرتے ہوئے کہا کہ جس اتحاد میں شوسینا، اکالی دل نہیں میں اسے این ڈی اے نہیں مانتا۔
انہوں نے کہا کہ شیوسینا کو مجبورا این ڈی اے سے نکلنا پڑا اور اب اکالی دل نکل گئی ہے، این ڈی اے کو اب نئے ساتھی مل گئے ہیں۔میں انہیں مبارکباد پیش کرتا ہوں۔
