ممبئی میں سائبر کرائم کی بڑھتی واردتوں کو دیکھتے ہوئے ممبئی پولیس نے سائبر کے پانچ پولیس تھانوں کی تشکیل کی ہے۔ اس موقع پر ریاست کے وزیر اعلیٰ ادھو ٹھاکرے کے ہاتھوں اس کا افتتاح عمل میں آیا۔
ممبئی پولیس ترجمان ایس چیتنیا نے بتایا کہ ممبئی شہر چونکہ پانچ ریجن میں تقسیم کیا گیا ہے اس لئے پوری ممبئی میں ریجن کے حساب سے سائبر کے پانچ نئے پولیس تھانوں کی تشکیل کی گئی ہے۔
سائبر پولیس تھانوں کی تشکیل کا مقصد یہ ہے کہ اب آن لائن فراڈ، اےٹی ایم فراڈ، اور بینکنگ فراڈ جیسی وارداتوں کے لئے عوام کو پولیس تھانوں کے چکر نہیں کاٹنے پڑیں گے بلکہ وہ سیدھے سائبر پولیس تھانوں کا رخ کریں۔ جہاں ان کے مسئلے کا حل نکالنے کے لئے سائبر ماہرین کی ٹیم ہمہ وقت تیار رہیگی۔
ممبئی میں 90 سے زائد پولیس تھانے ہیں۔ روزمرہ کی شکایتوں کے ساتھ ساتھ سائبر کرائم کی بھی شکایتیں ان پولیس تھانوں میں کی جاتی ہیں لیکن اس کے لئے سائبر ماہرین کی مدد کے بنا کسی بھی پولیس تھانے میں سائبر سے جڑے جرائم کو حل کرنے سے قاصر ہیں۔ امید کی جاتی ہے کہ سائبر کے نئے پولیس تھانوں کے سبب عوام کو راحت ملے گی۔
