وسیم رضوی کی پٹیشن خارج ہونے پر مسلم پرسنل لا بورڈ کے وکیل مومن مصدق مالیگاؤں سے ای ٹی وی بھارت اردو کے نمائندے نے خاص بات چیت کی ہے۔ اس موقع پر مومن مصدق نے کہا کہ پی آئی ایل داخل کرنے والا شخص ہی پٹیشن کے تعلق سے بنیادی طور پر نااہل ہے، کیونکہ وہ اس موضوع پر مہارت ہی نہیں رکھتا۔
واضح رہے کہ چند ماہ قبل شیعہ وقف بورڈ کے سابق چیئرمین وسیم رضوی نے سپریم کورٹ میں پی آئی ایل داخل کرکے یہ مطالبہ کیا تھا کہ قرآن مجید سے 26 آیتوں کو حذف کیا جائے- وسیم رضوی کے مطابق یہ آیات انسانوں کو تشدد اور دہشت گردی کی تعلیم دیتی ہیں۔
وسیم رضوی کی جانب سے داخل کی گئی درخواست پر جسٹس فالی نریمن، جسٹس بی آر گوئی اور جسٹس ہریشکیش رائے کی بنچ نے درخواست کی سماعت کی۔ عدالت نے عرضی مسترد کرتے ہوئے کہا کہ واقعی یہ ایک چھوٹی نچلے سطح کی درخواست ہے۔
درخواست میں وسیم رضوی نے دعویٰ کیا تھا کہ ان آیات کے حوالے سے دنیا کے لوگوں کو دہشت گرد بنایا جاتا ہے۔ وسیم رضوی کی درخواست کے بعد گزشتہ دنوں ایک اسلامی کانفرنس میں وسیم رضوی کو اسلام سے خارج قرار دیا گیا تھا اور انہیں کسی بھی قبرستان میں دفن نہیں کرنے دینے کا اعلان کیا گیا تھا۔ اس کانفرنس میں شیعہ اور سنی علمائے کرام شامل ہوئے تھے۔
ردعمل کے طور پر وسیم رضوی کے بھائی نے بھی ویڈیو جاری کر اعلان کیا تھا کہ وسیم سے ان کے کنبے کا کوئی تعلق نہیں ہے۔ اس کے علاوہ پورے ملک میں رضوی کے خلاف احتجاج کیا گیا۔ وسیم رضوی پر بہت سارے بدعنوانی کے معاملے درج ہیں اور وہ بھارت میں مسلمانوں کو مشتعل کرنے کے لئے مسلسل بیانات دیتے رہتے ہیں۔
