ریاست مہاراشٹر کے اکولا میں چھ کسانوں کی اجتماعی خودکشی کا معاملہ سامنے آیا ہے۔ اطلاع کےمطابق حکومت نے شاہراہ بنانے کے لئے ان کسانوں کی زمین اپنے تحویل میں لی ہے۔ خودکشی کی کوشش کرنے والے کسانوں کا کہنا ہے کہ دیگر کسانوں کے مقابلے میں انہیں بہت کم معاوضہ دیا گیا۔
اس سے پہلے 29 جولائی کو کسانوں نے ڈسٹرکٹ مجسٹریٹوں سے ملاقات کرکے معاوضے میں اضافہ کرنے کی درخواست کی تھی اور ان کے مطالبے کو تسلیم نہیں کئے جانے پر خودکشی کرنے کی دھمکی دی تھی۔
آج دوپہر کسان ڈسٹرکٹ مجسٹریٹ لونکر سے ملنے کے لئے آئے تھے اور جب مسٹر لونکر نے اس معاملے میں مدد کرنے پر اپنی نااہلی کا اظہار کیا تب ان کسانوں نے ان کے سامنے زہر پی لیا۔
خودکشی کرنے کی کوشش کرنے والے سبھی کسانوں کو علاج کے لئے اسپتال میں بھرتی کرایا گیا ہے جہاں ان کی حالت نازک بنی ہوئی ہے۔
