لیکن پولیس نے شیوکمار سمیت سابق مرکزی وزیر ملند دیورا، کانگریس کے ڈپٹی اپوزیشن لیڈر محمد عارف نسیم خان کو حراست میں لے لیا اور انہیں ممبئی یونیورسٹی کے گیسٹ ہاؤس میں نظر بند کر دیا۔
اطلاعات کے مطابق آج علی الصبح شیوکمار جب پوائی علاقے میں واقع ریننسن ہوٹل پہنچے تو یہ علاقہ پولیس چھاؤنی لگ رہا تھا ۔
مقامی ڈپٹی کمشنر آف پولیس اور اعلیٰ پولیس افسران نے شیو کمار کو ہوٹل میں جانے سے روک دیا جس کے بعد انہوں نے صحافیوں سے خطاب کرتے ہوئے کہا کہ ان کی یہ آمد باغی اراکین اسمبلی کے مدعو کرنے کے لیے ہے اور ان کے لیے ہوٹل میں ایک کمرہ بھی بک ہے مگر پولیس نے نظم و نسق کا بہانہ بنا کر انہیں ہوٹل میں قیام کرنے سے روک دیا ۔
اس موقع پر باغی اراکین اسمبلی کے کئی حامی بھی موجود تھے جنہوں نے شیوکمار واپس جاؤ کے نعرے لگائے۔
اسی درمیان باغی اراکین اسمبلی نے ممبئی پولیس میں شکایت درج کرائی ہے کہ ان کی جان کو خطرہ ہے اس لیے انہیں بھرپور تحفظ فراہم کیا جائے ۔
شیو کمار کو جب ہوٹل میں جانے سے روک دیا گیا تو وہ ہوٹل کے روبرو ہی ملند دیورا ،سنجے نروپم اور نسیم خان کے ہمراہ سڑک پر احتجاج کرنے بیٹھ گئے جس کے بعد پولیس نے انہیں اور دیگر کانگریسی رہنماؤں و کارکنان کوحراست میں لے لیا ۔
اس موقع پر صحافیوں سے خطاب کرتے ہوئے نسیم خان نے کہا کہ کرناٹک میں جمہوری طریقے سے منتخب ہوئی کانگریس و جنتادل کی حکومت کوگرانے کے لیے بی جے پی کی جانب سے مسلسل کوششیں جاری ہیں اورجس کے لیے مرکزی حکومت سے لے کر دیگر بی جے پی اقتدار والی ریاستوں کی مشینری کا غلط استعمال کرتے ہوئے بی جے پی کی جانب سے جمہوریت کا گلا گھوٹنے کی کوشش کی جارہی ہے۔
انہوں نے کہا کہ آمرانہ ذہنیت رکھنے والے بی جے پی رہنماؤں کا واحد ایجنڈا حزبِ مخالف کی حکومت نہ چلنے دینے کا ہے۔ اس کے لیے سام،دام،دنڈ ،بھید کا استعمال اور حکومتی مشینری کا غلط استعمال کیا جارہا ہے۔ گوا، منی پور، اروناچل پردیش وبہار میں اسی کا استعمال کرتے ہوئے بی جے پی نے اقتدار حاصل کیا ہے اوراب مغربی بنگال وکرناٹک میں بی جے پی کی وہی کوشش شروع ہے۔
سابق مرکزی وزیر ملند دیورا نے کہا کہ کرناٹک حکومت گرانے کے لیے مرکزی حکومت کے ساتھ مہاراشٹر کی فڑنویس حکومت بھی کوششیں کررہی ہے۔
ریاست کے وزراءعوام کے مسائل حل کرنے کے بجائے کرناٹک حکومت گرانے میں مصروف ہیں۔ بی جے پی کے لیڈران کے ذریعے کانگریس کے ممبران اسمبلی کو ذاتی طیارے سے ممبئی لاکر فائیواسٹار ہوٹلوں میں انہیں رکھا جارہا ہے۔
ملک کی سب سے امیر پارٹی بی جے پی کی جانب سے پیسوں کا لالچ دے کر اور اقتدار کا غلط استعمال کرکے دباوڈالا جارہا ہے۔ یہ جمہوریت کی بدقسمتی اور انتہائی افسوسناک باب ہے۔بی جے پی کی ان حرکتوں سے ملک میں جمہوریت کو زبردست خطرہ لاحق ہوگیا ہے۔
اسی درمیان ممبئی پولیس نے رینائسنس ہوٹل کے درمیان میں دفعہ 144نافذ کر دی ہے جس کے تحت چار سے زیادہ افراد کے اکٹھا ہونے پر پابندی عائد کر دی ہے۔
