'عوام بی جے پی -شیو سینا حکومت کو اکھاڑ پھینکیں'

نیشنلسٹ کانگریس پارٹی کے صدر شرد پوار نے کہا ہے کہ غلط ہاتھوں سے اقتدار چھیننا ان کی ذمہ داری تھی اور وہ بھارتیہ جنتا پارٹی شیوسینا کی مخلوط حکومت کو ختم کرنے کے لیے اس وقت تک کوئی کسر نہیں چھوڑیں جب تک انہیں اقتدار سے باہر نہیں کر دیتے۔

شرد پوار نے رادھانگری-بھدرگڑھ اسمبلی حلقے میں گزشتہ رات جلسے سے خطاب کرتے ہوئے کہا کہ ابھی تومیں جوان ہوں۔ انہوں نے عوام سے موجودہ حکومت کو اقتدار سے اکھاڑ پھینکنے میں امداد کی اپیل کی ۔

انہوں نے کہا کہ چھترپتی شیوجی مہاراج کی نگری سے موجودہ حکومت کو ہٹانے کی بنیاد ڈالی جائے گی ۔انہوں نے کہا کہ اسمبلی، لوک سبھا اور راجیہ سبھا کے انتخابات وہ 14 مرتبہ جیتے ہیں ۔ چار مرتبہ مہاراشٹر کے وزیر اعلی، مرکزی وزیر زراعت، خوراک اور وزیر دفاع رہے ۔

انہوں نے مزید کہا کہ وہ الیکشن نہیں لڑنا چاہتے تھے لیکن ریاست غلط ہاتھوں میں ہے، اس لیے وہ اس وقت تک چین سے نہیں بیٹھ سکتے جب تک موجودہ حکومت کو اقتدار سے باہر نہیں کر دیتے۔انہوں نے کہا کہ حال ہی میں مہاراشٹر میں سیلابی صورتحال تھی لیکن یہ حکومت سیلاب متاثرین کی امداد نہیں کر پائی ۔

انہوں نے کہا کہ وزیر اعلی اور دیگر رہنما متاثرین کی ا مداد کے بجائے سیلاب کا ہوائی سروے کرنے میں مصروف رہے۔جس ریاست میں کسان خودکشی کر رہے ہوں وہاں کی حکومت کس طرح چین سے بیٹھ سکتی ہے ۔ جب ان کی حکومت تھی تب انہوں نے کسانوں کو 70 ہزار کروڑ روپے کی ا مداد کی تھی ۔ موجودہ حکومت صرف صنعت کاروں کے قرض معاف کر رہی ہے۔