عدالت عظمیٰ میں جسٹس سنجے کشن کول اور جسٹس آر سبھاش ریڈی کی بینچ نے سابق پولیس کمشنر کو بامبے ہائی کورٹ سے رجوع کرنے کی صلاح دی ہے۔
سُپریم کورٹ میں شنوائی کے دوران بینچ نے سوال کیا کہ عرضی گزار آئین کی دفعہ 226 کے تحت بامبے ہائی کورٹ میں عرضی داخل کرنے کی بجائے دفعہ 32 کے تحت سُپریم کورٹ میں عرضی دائر کرنے کا فیصلہ کیوں کیا؟
عدالت نے مزید پوچھا کہ آخر کار انہوں نے وزیر داخلہ کو اس میں فریق کیوں نہیں بنایا؟
پرمبیر سنگھ کی جانب سے پیش ہونے والے وکیل مُکل روہتگی نے عدالت سے کہا کہ وہ عرضی میں انل دیشمکھ کو فریق بنانے کو تیار ہیں۔ حالانکہ عدالت نے عرضی گزار کو پہلے ہائی کورٹ جانے کی صلاح دی۔
واضح رہے کہ مہاراشٹر میں جاری سیاسی ہنگامہ آرائی کے درمیان سابق کمشنر نے انل دیشمکھ کے خلاف بدعنوانی کی تفتیش سی بی آئی سے کروانے اور اپنے تبادلے پر روک لگانے کے مطالبے پر سپریم کورٹ کا دروازہ کھٹکھٹایا تھا۔
ملک کے بڑے صنعتکار مکیش امبانی کے گھر ’اینٹیلیا‘ کے سامنے جیلیٹن چھڑوں سے لیس گاڑی برآمد کیے جانے کے پیش نظر کمشنر کے عہدے سے ہٹائے گئے مسٹر سنگھ نے اپنے تبادلے کو بھی چیلنج کیا تھا۔
عرضی گذار نے کہا تھا کہ مسٹر دیشمکھ اپنی رہائش گاہ پر فروری 2021 میں ممبئی جرائم کی خفیہ یونٹ کے سچن واجے اور ممبئی کے سوشل سروس برانچ کے ایس پی سنجے پاٹل سمیت مختلف پولیس افسران سے ملے تھے اور انھیں کئی ماہ 100 کروڑ روپیے اکٹھا کرنے کی ہدایت دی تھی۔ ان افسران سے کہا گیا تھا کہ وہ مختلف اداروں اور دیگر ذرائع سے وصولی کریں۔
مسٹر سنگھ نے اپنی عرضی میں کہا تھا کہ مسٹر دیش مکھ کے گھر میں لگے سی سی ٹی وی کو قبضے میں لیا جانا چاہیے اور اس کی چھان بین کی جانی چاہیے تاکہ ان کے یہاں آنے جانے والے افسران کی فہرست تیار کی جا سکے۔
