مہاراشٹر میں عبادت گاہوں کو آج سے کھول دیا گیا

ڈیڑھ برس کے بعد مہاراشٹر کی عبادت گاہوں کو عوام کے لیے پھر سے کھول دیا گیا ہے۔ ریاستی حکومت نے جب یہ فرمان جاری کیا تو ریاست کی مسجد، مندر اور گرجا گھر کے منتظمین اور عوام نے خوشی کا اظہار کیا۔ بھنڈی بازار کی مینارہ مسجد میں بھی لوگوں نے خوشی کا اظہار کیا۔

جامع مسجد ممبئی کے چیئرمین شعیب خطیب نے کہا کہ ہم حکومت کی جانب سے بنائے گئے کووڈ قوانین پر عمل کررہے ہیں مسجد میں آنے والوں کو بھی اس پر عمل کرنے کی ہدایت دے رہے ہیں۔ وہیں دوسری جانب سدھی ونایک مندر میں عوام کے ساتھ ساتھ بی جے پی کارکنان پہنچے۔ انہوں نے ڈیڑھ برس تک بند رہنے والے مندروں لیکر ریاست حکومت پر نشانہ سادھتے ہوئے حکومت کی ناکامی بتائی۔

وہیں ممبئی کی ماہم درگاہ میں ممبئی کے وزیر نگران اسلم شیخ نے حاضری دیتے ہوئے عوام سے کووڈ قوانین پر عمل کرنے کے لئے کہا۔

سدھی ونایک مندر

حالانکہ کووڈ کی پہلی لہر کے بعد حکومت نے عبادت گاہیں کھولنے کا حکم جاری کیا تھا لیکن کورونا کے مریضوں کی بڑھتی تعداد کو دیکھتے ہوئے حکومت نے عبادت گاہوں پر دوبارہ قفل لگانے کا فرمان جاری کیا تھا۔

تیسری لہر کو لیکر حکومت نے سنجیدگی اختیار کی تھی لیکن عوام اور عبادت گاہوں کے منتظمین کے لگاتار اسرار کے بعد حکومت نے عبادت گاہوں کو کھولنے کا حکم جاری کیا، لیکن اس کے ساتھ ساتھ حکومت نے یہ واضح کردیا ہے کہ عوام کووڈ قوانین پر سختی سے عمل کریں ایسا نہ ہو کہ لاپرواہی کے سبب کورونا کے مریضوں کی تعداد میں اضافہ ہوجائے، اگر اضافہ ہوا تو حکومت ان جگہوں پر پھر سے قفل لگانے کے لئے مجبور ہوگی۔