ریاست مہاراشٹر کی تین سیاسی پارٹیوں کے اتحاد شیوسینا، کانگریس، این سی پی جسے مہاوکاس اگھاڑی کا نام دیا گیا ہے جس میں دو اراکین اسمبلی کی طاقت رکھنے والی سماج وادی پارٹی نے بھی ان تینوں سیاسی پارٹیوں کے ہمراہ مل کر بی جے پی کے خلاف حکومت سازی میں شامل ہونے کا اعلان کیا۔
اس موقع پر رکن اسمبلی ابو عاصم اعظمی نے کہا کہ پارٹی صدر اکھلیش یادو کی منظوری کے بعد میں نے مہاوکاس اگھاڑی کی حمایت کرنے کا فیصلہ کیا ہے، جس کا اہم مقصد محض یہ ہے کہ بی جے پی کو اقتدار سے دور رکھا جائے۔
سماج وادی پارٹی کے بھیونڈی سے رکن اسمبلی رئیس شیخ نے کہا کہ بی جے پی حکومت نے رات کے اندھیرے میں وزیراعلیٰ اور نائب وزیراعلیٰ کے عہدے کی حلف برداری کرائی تھی۔
انہوں نے کہا کہ دن کے اجالے میں ہم نے 162 اراکین اسمبلی کی طاقت کا مظاہرہ کرتے ہوئے یہ ثابت کردیا ہے کہ ہم اکثریت میں ہیں، لہذا دیویندر فڑنویس اور اجیت پوار کو فوری طور سے اپنے عہدے سے استعفیٰ دینا ہوگا۔
ان کے مستعفی ہونے کے بعد گورنر کو ہمیں حکومت سازی کے لیے طلب کرنا چاہیے۔
