مالیگاؤں سے دیولہ جانے والی ایس ٹی بس اور رکشا کے درمیان زبردست ٹکر ہونے کے سبب علاقے میں افراتفری پھیل گئی۔
اس حادثے میں بس اور رکشا دونوں ہی کنویں میں گر گئے جس کی وجہ سے اب تک ہلاکت 26 تک پہنچ چکی ہے جبکہ زخمیوں کی تعداد بڑھ کر 35 ہوگئی ہے۔
وہیں وزیر اعظم نے ہلاک شدگان کے اہل خانہ سے اظہارتعزیت کیا ہے۔ وزیر اعظم کے دفتر سے جاری ٹویٹ میں مذکورہ سانحہ پر گہرے رنج کا اظہار کیا گیا ہے۔
مہاراشٹر کے وزیر ٹرانسپورٹ ایم ایس آر ٹی سی کے چیئرمین انل پرب نے منگل کے روز ناسک حادثے میں ہلاک ہونے والوں کے لواحقین کو 10-10 لاکھ روپے معاوضہ دینے کا اعلان کیا ہے۔
پرب نے بتایا کہ 'ناسک کے قریب حادثہ انتہائی افسوسناک ہے۔ ہلاک ہونے والے افراد کے لواحقین کو 10 لاکھ روپے معاوضہ اور تمام زخمیوں کو مفت طبی امداد دی جائے گی'۔
پولیس اور راحت رسانی کے دستوں نے کافی مشقت کے بعد دونوں گاڑیوں کو کنویں کے باہر نکالا اور اس حادثے میں زخمی ہونے والے مسافروں کو جنرل اسپتال میں علاج کے لیے داخل کرا دیا گیا۔
اچانک بس کا ایک ٹائر پھٹ گیا جس کی وجہ سے ڈرائیور توازن برقرار نہ رکھ سکا اور یہ حادثہ رونما ہوا۔
