ریاست مہاراشٹر کے دارالحکومت ممبئی کی مقامی عدالت نے کورونا وائرس وبا کے دوران جاری لاک ڈاؤن میں ممنوعہ احکامات کی خلاف ورزی کے الزام میں دہلی کے مرکز میں ہوئے تبلیغی جماعت کے اجتماع میں شرکت کرنے والے 20 غیر ملکیوں کو باعزت بری کر دیا ہے۔
گذشتہ روز جاری کیے گئے اپنے ایک حکم میں مقامی اندھیری میٹروپولیٹن عدالت کے مجسٹریٹ آر آر خان نے کہا کے استغاثہ نے ملزمین پر جو الزمات عائد کیے تھے وہ ثابت کرنے میں ناکام رہا ہے۔
عدالت نے مزید کہا کہ 'معاملے کے ریکارڈ، حقائق اور حالات کے شواہد کو مدنظر رکھتے ہوئے یہ واضح ہے کہ زیر سماعت حکم کو نہ تو عوامی طور پر نافذ کیا گیا اور نہ ہی ملزمین کے نوٹس میں لایا گیا'۔
مجسٹریٹ آر آر خان نے اپنے حکم میں اس ضمن میں گواہوں نے استغاثہ کا ذکر کرتے ہوئے کہا کہ گواہوں نے بھی دوران گواہی عدالت کو بتلایا کہ ملزمین نے پولیس کمشنر کے لاک ڈاؤن اصولوں اور حکم کی خلاف ورزی نہیں کی ہے۔
عدالت نے یہ بھی کہا کہ گواہوں کے بیانات ریکارڈ پر موجود دستاویزی ثبوتوں کے برخلاف ہیں۔
واضح رہے کہ اپریل کے مہینے میں ڈی این نگر پولیس اسٹیشن نے ملزمین کے خلاف تعزیرات ہند کی دفعات 188 (سرکاری ملازمین کے ذریعہ حکم کی نافرمانی)، 269 اور 270 (خطرناک بیماری کا انفیکشن پھیلانے کا امکان) کے تحت مقدمہ درج کیا تھا۔ ان پر غیر ملکی دفعات، وبائی امراض بیماری دفعات اور ڈیزاسٹر مینجمنٹ ایکٹ کی دفعات کے تحت بھی الزمات عائد کیے گئے تھے۔
