ممبئی پولیس نے جعلی ٹی آر پی ریکٹ کا پردہ فاش کرنے کا دعویٰ کرتے ہوئے کہا ہے کہ نجی چینل ری پبلک ٹی وی سمیت 3 چینلز پیسے دے کر ٹی آر پی خریدتے ہیں۔ ان چینلز کی جانچ کی جا رہی ہے جبکہ ٹی آر پی میں جعلسازی کرنے والے گروہ کے دو افراد کو اس معاملے میں گرفتار بھی کیا گیا ہے۔
ممبئی پولیس کمشنر پرم بیر سنگھ نے کہا کہ پولیس کے خلاف پروپیگنڈا چلایا جارہا تھا۔
انہوں نے بتایا کہ ہمیں ایسی اطلاعات موصول ہوئی ہیں کہ پولیس کے خلاف جعلی پروپیگنڈا چلایا جا رہا ہے۔ کرائم برانچ نے فالس ٹی آر پی (ٹیلی ویژن ریٹنگ پوائنٹس) کے حوالے سے تحقیقات کی جس کے بعد ایک نئے ریکٹ کا پردہ فاش ہوا ہے۔
پولیس کمشنر نے بتایا کہ ٹیلی ویژن انڈسٹری میں 30 سے 40 ہزار کروڑ کے اشتہارات آتے ہیں اور ان اشتہارات کی شرحوں کا فیصلہ ٹی آر پی کی بنیاد پر کیا جاتا ہے۔ بی اے آر سی اس کی نگرانی کرنے والی ایک تنظیم ہے۔
انہوں نے بتایا کہ ہم نے اس معاملے میں اب تک دو لوگوں کو گرفتار کرکے عدالت میں پیش کیا ہے اور ہمیں ان کی تحویل بھی مل گئی ہے۔ پولیس نے بتایا کہ ملزمین کچھ گھروں میں رشوت دیتے تھے اور ان سے اپنے گھر پر ایک مخصوص چینلز چلاتے رہنے کے لیے کہا کرتے تھے۔ یہ گروہ منظم طور پر ایک خاص چینل کو فائدہ پہنچانے کے لیے کام کر رہا تھا۔
پولیس کمشنر پرم بیر سنگھ نے مزید بتایا کہ ایک ملزم کے قبضے سے 20 لاکھ روپے نقد ضبط کئے گئے ہیں جبکہ اس کے بینک لاکر میں ساڑھے آٹھ لاکھ روپے پائے گئے ہیں۔ انہوں نے بتایا کہ مزید تحقیقات جاری ہے اور اس سلسلے میں مزید اطلاعات دی جائیں گی۔
