'شہریت ترمیمی بل سے پورے ملک کو نقصان ہوگا'

شہریت ترمیمی بل لوک سبھا میں منظور ہونے کے بعد ملک بھر میں اس کے خلاف مظاہرے ہو رہے ہیں، اس کے بعد این سی پی کے رکن اسمبلی جتیندر اوہاڑ نے اس بل کو ملک کے لیے نقصان دہ قرار دیا ہے۔

اس معاملے میں ریاست مہاراشٹر کے دارالحکومت ممبئی سے متصل مسلم اکثریتی علاقہ ممبرا کے رکن اسمبلی جتیندر اوہاڑ نے ای ٹی وی بھارت سے بات کرتے ہوئے کہا کہ 'مجھے لگتا ہے کہ بھارت کو مذہب کی بنیاد پر تقسیم کرنے کی منشاء ہے اور یہ کوئی نیا نہیں بلکہ آر ایس ایس کا پرانا نظریہ ہے'۔

انہوں نے کہا کہ 'آر ایس ایس کے بانی گولولکر نے کہا تھا کہ بھارت میں ہندوؤں کو چھوڑ کر بقیہ تمام مذاہب کے ماننے والے دوم درجےکے شہری ہیں اور بھارت صرف ہندوؤں کا ملک ہے'۔

جیتیندر اوہاڑ نے کہا کہ 'شہریت ترمیمی بل سے صرف ایک طبقہ نہیں بلکہ پورے ملک کا نقصان ہوگا'۔

واضح رہے کہ گزشتہ روز مرکزی وزیر داخلہ امت شاہ نے لوک سبھا میں شہریت ترمیمی بل پیش کیا تھا اور زبردست مخالفت کے باوجود اکثریت کے ساتھ یہ بل پاس ہوگیا۔