سوشل میڈیا پر ان دنوں بندروں اور کتوں کے درمیان گینگ وار Monkeys vs Dogs Gang War کی خبریں تیزی سے وائرل ہو رہی ہیں جو مہاراشٹر کے ضلع بیڑ کی ہیں۔
دراصل ضلع بیڑ کے ماجلگاؤں میں بندر اور کتوں کے درمیان بدلے کی جنگ جاری ہے اور بندروں نے اب تک تقریباً 250 کتوں کو مار ڈالا ہے۔
عالم یہ ہے کہ بندر کتے کے بچے کو لے کر محلے کے کسی بھی مکان کی چھت پر پہنچ جاتے ہیں جس سے وہاں موجود لوگوں کو اپنے اوپر حملے کا خطرہ محسوس ہو رہا ہے۔
بندروں کی جانب انتقام کی یہ کارروائی گزشتہ ایک ماہ سے جاری ہے۔ گاؤں میں بندروں کے ایک گروہ نے بدلے کی آگ میں اب تقریباً 250 کتوں کو مار ڈالا۔
گاؤں والوں کے مطابق بندروں نے کتوں سے بدلہ لینے کا سلسلہ اس وقت شروع کیا جب کچھ کتوں نے ایک بندر کے بچے کو مار ڈالا تھا۔
اس واقعہ کے بعد بندروں کو غصہ آیا اور انہوں نے بدلہ لینے کے لیے کتوں کو مارنا شروع کردیا۔
کتے کو دیکھتے ہی بندر اسے گھسیٹ کر لے جاتے اور اسے مکان کی اونچی چھت یا درخت کی بلند ترین شاخ سے اسے پھینک دیتے جس کی وجہ سے کتے کی موت ہو جاتی ہے۔
سوشل میڈیا پر وائرل ویڈیوز اور فوٹوز کو دیکھ کر اندازہ ہوتو ہے کہ کس طرح اچانک بندروں کا ایک گروپ کسی بھی چھت سے سڑک پر چھلانگ لگا دیتا ہے۔ اس متشدد بندر کو دیکھ کر لوگ ادھر ادھر بھاگنے لگتے ہیں۔ بعض اوقات لوگ بھاگتے ہوئے زخمی ہو جاتے ہیں۔
گاؤں والوں کا کہنا ہے کہ حالات ایسے ہو گئے ہیں کہ گاؤں میں شاید ہی کوئی کتا بچا ہو۔ بندروں میں اتنا غصہ ہے کہ اب وہ اسکول کے بچوں کو بھی نشانہ بنا رہے ہیں۔ بندروں کے غصے سے گاؤں میں خوف کا ماحول ہے۔
تقریباً پانچ ہزار کی آبادی والے اس گاؤں کے لوگ بندروں کی دہشت سے اس قدر پریشان ہو چکے ہیں کہ انہیں محکمہ جنگلات سے مدد اور خود کی حفاظت کی گُہار لگانی پڑی جس کے بعد محکمہ جنگلات نے چند بندروں کو پنجرے میں قید کیا ہے لیکن لوگوں کا کہنا ہے کہ اس کا مستقل حل نکالنا ضروری ہے۔
