ریاست مہاراشٹر کے معروف شہر مالیگاؤں میں قومی شاہراہ پر واقع شملہ ان ہوٹل کے قریب گزشتہ شب ایک سڑک حادثہ پیش آیا. خبر کے مطابق اس حادثہ میں 2 موٹر سائیکل سوار آپس میں ٹکرا گئے. بتایا جارہا ہے کہ ایک موٹر سائیکل رانگ سائیڈ سے آرہی تھی، جس کی وجہ سے مالیگاؤں کی سمت آرہی موٹر سائیکل اور غلط سمت سے آنے والے دونوں بائک سوار اچانک حادثے کا شکار ہوگئے۔
موصول اطلاع کے مطابق اس حادثہ میں شفیق شاہ حسین شاہ 19 سالہ نوجوان شدید طور پر زخمی ہوگیا. حادثہ کے قریب موجود لوگوں نے شفیق شاہ کو علاج کے لئے سکس سگما اسپتال میں منتقل کیا. تاہم وہاں دورانِ علاج زخموں کی تاب نہ لاتے ہوئے اس کی موت واقع ہوگئی. واضح رہے کہ ہلاک شدہ شفیق شاہ کے والد حسین شاہ رکشا ڈرائیور ہے جو نہال نگر میں رہائش پذیر ہے۔
ہلاک شدہ شفیق شاہ کے پوسٹ مارٹم و قانونی کارروائی میں شفیق شیخ، نہال (برتن والے)، جبار ممبر، سلیم (ٹیکسی والے) وغیرہ نے معاونت کی. معلوم ہو کہ حادثے کا سبب بنی موٹر سائیکل سوار موقع سے زخمی نوجوانوں کی مدد کرنے کی بجائے فرار ہوگئے.
تمام قانونی مراحل کی تکمیل کے بعد لاش کو اہل خانہ کے حوالے کردیا گیا. بعدازاں شفیق شاہ کی تدفین رات ہی میں عمل میں آئی. واضح رہے کہ اس معاملے میں تعلقہ پولیس کاروائی میں مصروف نظر آئی۔ پولیس کے ساتھ ساتھ علاقہ کے بااثر افراد نے اپیل کی کہ نوجوان تفریح کے لئے رات کے وقت قومی شاہراہوں کی ہوٹلوں پر جانے سے گریز کریں۔
