اہانت رسولﷺ کے خلاف مہاراشٹر بند Maharashtra Bandh کے دوران مالیگاؤں میں ہونے والے تشدد کے الزام میں گرفتار ملزمین کو مقامی سیشن کورٹ سے ضمانت نہ ملنے پر اب جمیعت العماء کے توسط سے بامبے ہائی کورٹ میں 6 ملزمین کی ضمانت کی عرضی داخل کی گئی ہے۔
جن ملزمین کی ضمانت عرضداشت داخل کی گئی ہے ان کے نام ضیاء الرحمن، عمار انصاری، صابر گوہر، سرفراز جاوید، شیخ عمران اور عارف اختر ہیں۔
گزشتہ روز جمعیت العلماء مالیگاؤں کے ایک نمائندہ وفد نے قانونی امداد کمیٹی کے سربراہ گلزار اعظمی سے ملاقات کرنے کے بعد وکلاء شریف شیخ، متین شیخ، انصاری تنبولی، شاہد ندیم وغیرہ سے ملاقات کی تھی۔
اس تعلق سے ایڈوکیٹ شاہد ندیم نے بتایا کہ پہلے مرحلے میں چھ ملزمین کی ضمانت عرضداشت بامبے ہائی کورٹ میں داخل کردی گئی ہے جن پر اقدام قتل جیسی سنگین دفعات کا اطلاق نہیں کیا گیا ہے۔
انہوں نے مزید کہا کہ فی الحال ہائی کورٹ میں کرسمس کی تعطیلات چل رہی ہیں اور اگلے ہفتے ہائی کورٹ کُھلنے کے بعد دیگر لوگوں کی بھی ضمانت عرضداشت داخل کرنے کا عمل شروع کیا جائے گا جن پر اقدام قتل کا الزام عائد کیا گیا ہے۔
ایڈووکیٹ شاہد ندیم نے مزید کہا کہ 'چند ملزمین کے وکالت نامے انہیں ملنا باقی ہیں جس کی وجہ سے ضمانت عرضداشت داخل کرنے میں تاخیر ہوسکتی ہے۔
جبکہ اس معاملے میں ان کی کوشش جاری ہے کہ جلد از جلد تمام ملزمین کی ضمانت عرضداشت داخل کرکے پولیس پر دباؤ بنایا جائے تاکہ وہ تفتیش مکمل کرکے مقامی عدالت میں چارج شیٹ داخل کرے۔
