دوپہر تین بجے سٹانہ ناکہ سے سی اے اے کی حمایت میں برادران وطن نے ایک حمایتی ریلی نکالی اور گاندھی مجسمہ موسم پل سے ہوتے ہوئے یہ ریلی آج شام پانچ بجے کلکٹر آفس پر اختتام پذیر ہوئی۔
اس ریلی میں شہر کے معروف وکلاء، ڈاکٹرس اور تاجر کے علاوہ بی جے پی اور اے بی وی پی کے کارکن نظر آئے۔
اس حمایتی ریلی کی پولس سے اجازت ملنے کے بعد شہر کی مختلف چوک چوراہوں اور کالجوں میں اے بی وی پی کے کارکنوں نے حمایتی پمفلٹ تقسیم کیے لیکن اس پمفلیٹ میں کسی بھی پارٹی یا سیاسی رہنما اور شخص کا نام نہیں تھا۔
آج کی اس ریلی میں کل ملا کر بیس ہزار سے زائد کی تعداد میں افراد جن میں خاص کر خواتین، طلبہ و نوجوانوں نے بھی شرکت کی۔ پولس انتظامیہ اور فوجی دستے اس ریلی کی حفاظت میں آگے اور پیچھے تنعنیات رہے۔ اس ریلی میں لوگوں نے امت شاہ اور نریندر مودی کے نام کے نعرے بھی لگائے۔
دوسری جانب شہر کے مسلم اکثریتی علاقے میں آج شام چھ بجے طلباء و طالبات میں تنظیم مالیگاؤں اسٹوڈنٹس آرگنائزیشن کی جانب سے اے ٹی ٹی اسکول میں سی اے اے کے خلاف احتجاجی جلسہ منعقد کیا گیا ہے۔ اس احتجاجی جلسہ کو شہر کے رکن اسمبلی مفتی محمد اسماعیل قاسمی کی حمایت حاصل ہے۔
