آج کے اس دور جدید نے مشینیری کے بعد کمپیوٹر سائنس اور آٹومیشن کے شعبے میں ہوئی انقلابی ترقی نے دنیا کا نقشہ بدل دیا ہے۔ ماہرین کے مطابق آنے والے کچھ سالوں میں ہماری روز مرہ کی زندگی آرٹیفیشیل انٹیلجنس، مشین لرننگ اور ڈاٹا سائنس جیسی ٹیکنالوجی کے بغیر ادھوری ہوگی۔
موجودہ دور کے سب اہم شعبوں میں شمار کمپیوٹر سائنس اور آٹومیشن کے میدان میں اب مسلم نوجوان بھی آگے بڑھ رہے ہیں۔ حال ہی میں مالیگاؤں کے نشاط نگر، نور باغ علاقے سے تعلق رکھنے والے اردو میڈیم کے طالب علم محمد انس محمد امین کا مہاراشٹر کے ٹاپ آٹونومس انجینئرنگ کالج میں بی ٹیک کمپیوٹر انجینئرنگ اینڈ آرٹیفیشیل انٹیلجنس میں داخلہ ہوا ہے۔
اس سلسلے میں محمد انس محمد امین نے ای ٹی وی بھارت کے نمائندے عبداللہ انصاری کو ایک انٹرویو میں بتایا کہ انہوں نے اے ٹی ٹی ہائی اسکول و جونئیر کالج میں بارہویں پاس کیا۔
اس کے بعد مہاراشٹر کومن انٹرنس ٹسٹ 2020 میں انہوں نے 89 فیصد حاصل کیے۔ ڈی ٹی ای کے انجینئرنگ ایڈمیشن کے پہلے راؤنڈ میں ہی بی ٹیک کمپیوٹر انجینئرنگ اینڈ آرٹیفیشیل انٹیلجنس شعبہ میں مہاراشٹر کے ٹاپ آٹونومس سنجیونی انجینئرنگ کالج میں ان کا داخلہ ہو ا ہے۔
محمد انس کی پیدائش 25 جون 2006 میں ہوئی۔ موصوف کا تعلق نشاط نگر نور باغ کے ایک علمی گھرانے سے ہے۔ ان کے والد پروفیسر مومن محمد امین بذات خود سول انجینئر ہیں۔
ان کا شمار بھی شہر کے اولین انجینئروں میں ہوتا ہے۔ محمد انس کا تعلق شہر کے مشہور خانوادے کامریڈ صدیق ماشٹر سے ہے۔ موصوف نے اپنی بنیادی تعلیم شیخ عبدالودود پرائمری اسکول اور پانچویں تا بارہویں کی تعلیم اے ٹی ٹی ہائی اسکول اینڈ جونیئر کالج (مالیگاؤں) سے حاصل کی۔
ایس ایس سی تک کی تعلیم مادری زبان کی اسکولوں سے مکمل کی.اس کے علاوہ انھوں نے ہر جماعت میں امتیازی نمبرات کے ساتھ کامیابی حاصل کی۔ ان کا پسندیدہ مضمون سائنس رہا۔ جبکہ اسپورٹ میں باڈی بلڈنگ (جم) کا شوق ہے۔
محمد انس نے اپنے بھائی جوکہ مالیگاؤں کےاولین گولڈ میڈلسٹ انصاری عبداللہ (آئی آئی ٹین) کے مشورے سے بی ٹیک کمپیوٹر انجینئرنگ اینڈ آرٹیفیشیل انٹیلجنس شعبہ کا انتخاب کیا۔ موصوف نے آرٹیفیشیل انٹیلجنس کے معنی آسان زبان میں ایک مصنوعی دماغ بتایا۔
انہوں نے مزید کہا کہ ماہرین کے مطابق آنے والے کچھ سالوں میں ہماری روزمرہ کی زندگی آرٹیفیشیل انٹیلجنس، مشںین لرننگ اور ڈاٹا سائنس جیسی ٹیکنالوجی کے بغیر ادھوری ہوگی۔ اس ضمن میں موصوف نے گوگل اسسٹنٹ آئی پی ایل کرکٹ میچ اسکور کی مثال بھی دی۔
محمد انس نے طلباء کو نصیحت کرتے ہوئے کہا کہ سوشل میڈیا کا استعمال حسب ضرورت کریں اور مستقبل میں کیا کرنا ہے اس کو اپنا ہدف بنا لیں اور مسلسل جدوجہد کر یں۔
