ریاست مہاراشٹر کے ضلع ناسک سمیت مالیگاؤں شہر میں کورونا وائرس کے بڑھتے معاملات کے سبب صورتحال تشویشناک ہوتی جارہی ہے جہاں مریضوں کی تعداد میں دن بہ دن اضافہ ہوتا جارہا ہے، وہیں شہر کے پرائیویٹ اسپتالوں اور دوا خانوں میں مریضوں کی تعداد کے پیش نظر آکسیجن سلنڈر کی کمی دیکھی جارہی ہے۔ اس ضمن میں پرائیویٹ اسپتال انتظامیہ اور مالیگاؤں کارپوریشن کے محکمہ صحت عملہ کے علاوہ شہر کے بیشتر سرکردہ افراد نے دواخانوں میں آکسیجن سلنڈر کم ہونے کی شکایت کی ہے۔
اطلاع کے مطابق جب شہر میں آکسیجن سلنڈر فراہم کرنے والی ایجنسی سے رابطہ کیا گیا تو انہوں نے کہا کہ ناسک سے کوٹہ کم کردیا گیا ہے، جس کی وجہ سے سلنڈر کی مقدار کم آرہی ہیں۔
اس تعلق سے سابق رکن اسمبلی آصف شیخ نے جمعہ کو وزیر صحت راجیش ٹوپے سے فون پر گفتگو کی اور مالیگاؤں کے حالات سے روشناس کروایا۔
آصف شیخ نے کہا کہ شہر میں رفتہ رفتہ مریضوں کی تعداد بڑھ رہی ہے، اس پر پرائیویٹ اسپتال انتظامیہ اور کارپوریشن قابو پانے کی کوشش کررہی ہے لیکن آج بھی شہر کے زیادہ تر اسپتال میں مریضوں کی تعداد کے مقابلے آکسیجن سلنڈر کم نظر آرہے ہیں لہذا آپ ناسک ضلع کلکٹر کو فوری حکم دیں کہ وہ مالیگاؤں شہر میں آکسیجن سلنڈر کی تعداد میں اضافہ کریں اور زیادہ مقدار میں آکسیجن سلنڈر فراہم کریں۔
آصف شیخ سے گفتگو کے بعد وزیر صحت راجیش ٹوپے نے ناسک ضلع کلکٹر سورج مانڈھرے کو حکم دیتے ہوئے کہا کہ مالیگاؤں شہر میں جس طرح کی ضرورت ہو اس کا فوری حل نکالا جائے اور جلد از جلد شہر میں زیادہ مقدار میں آکسیجن سلنڈر فراہم کرایا جائے۔
