مالیگاؤں: 500 سے زائد آوارہ کتوں کی نس بندی

مہاراشٹر کے مالیگاؤں میں انتظامیہ کو ہر روز آوارہ کتوں کے حملے کی شکایت موصول ہو رہی تھی جس کے بعد سے شہر کے 500 سے زائد کتوں کی نس بندی کی گئی ہے۔ روزانہ 30 سے 35 کتوں کی نس بندی کی جارہی ہے۔

ریاست مہاراشٹر کے شہر مالیگاوں میں آوارہ کتوں کی تعداد میں مسلسل اضافہ دیکھا جارہا تھا۔ آئے دن شہر میں آوارہ کتوں کے حملے کی خبریں سامنے آرہی ہیں۔ رات کے وقت شہر کے ہر اہم چوک چوراہوں پر کتوں کا جھنڈ نظر آتا ہے جس سے راہگیروں اور بالخصوص خواتین اور بچوں کو کافی تکلیف کا سامنا ہے اور کئی لوگوں نے کتے کے کاٹنے کی شکایت بھی کی تھی۔ اس ضمن میں کارپوریشن انتظامیہ نے ان آوارہ کتوں کی نس بندی کرنے کا فیصلہ کیا ہے۔

موصولہ اطلاع کے مطابق ہر روز 30 سے 35 کتوں کی نس بندی کی جارہی ہے۔ مقامی کارپوریشن نے کتوں کی نس بندی کا کام پونہ کی ایک پرائیویٹ کمپنی کو دیا ہے۔ کتوں کی نس بندی کرنے والے ڈاکٹر نے ای ٹی وی بھارت کے نمائندے کو بتایا کہ اس ماہ سے شہر کے مختلف علاقوں سے کتوں کو اٹھا کر ان کا آپریشن کیا جارہا ہے اور ہر روز 30 سے 35 کتوں کی نس بندی کی جارہی ہے۔

وہیں ڈاکٹر کا یہ بھی کہنا ہے کہ نس بندی کے بعد کتے خونخوار نہیں رہتے اور ان کی نشوونما میں اضافہ نہیں ہوگا۔ آج 14 دسمبر تک ہم نے شہر کے 500 سے زائد آوارہ کتوں کی نس بندی کر انہیں ان کی جگہ دوبارہ چھوڑ دیا ہے۔