ریاست مہاراشٹر کے مسلم اکثریتی اور پسماندہ علاقوں میں مسلمانوں میں اسکولی تعلیم کو یقینی بنانے اور ڈراپ آؤٹ کی روک تھام کے لیے شہر مالیگاؤں کے مختلف شعبوں اور میدانوں میں سرگرم شخصیتوں نے سی سی آئی (کمیونٹی کوآرڈینیشن انسٹی ٹیوٹ) کی جانب سے مستعدی کا مظاہرہ کرتے ہوئے آج ایک سیمینار ویبینار کا انعقاد کیا۔ اس پروگرام کی صدارت انجمن ترقی تعلیم کے صدر الحاج رئیس نے نبھائی۔
مزید پڑھیں: اورنگ آباد: کارپوریشن اساتذہ گھر گھر جاکر طلبا کو تعلیم دے رہے ہیں
اس پروگرام کے آخر میں سی سی آئی کے قومی صدر پروفیسر عبدالمجید صدیقی نے نمائندے سے بات چیت کے دوران اس سیمینار کے تعلق سے بتایا کہ طلبا کے اسکول ترک کرنے کا مسئلہ، تدریسی سرگرمیوں میں جدید آلات کا استعمال کتنا مفید کتنا مضر جیسے موضوع پر حکومت مہاراشٹر کے ذیلی ادارے (Scert) نے بریج کورس ترتیب دیا ہے۔ اس سے طلبا کو مستفیض کرنے کی کوشش کی جائے گی۔
انہوں نے کہا کہ ان تینوں مسائل کے حل کے لئے جہاں انتظامیہ اور اساتذہ کو آگے آنا ہے وہیں سرپرست کو بھی اس سلسلہ وار تحریک میں شامل ہونا ہوگا۔ عبدالمجید صدیقی نے کہا کہ سی سی آئی کی اس تعلیمی تحریک کو کامیاب بنانے کے لیے انتظامیہ، اساتذہ اور خاص طور پر سرپرستوں کو عملی تعاون دینا ہوگا۔
اس موقع پر مالیگاؤں گرلز ہائی اسکول کی ایک معلمہ نے اس سیمینار کے تعلق سے بتاتے ہوئے کہا کہ لاک ڈاؤن اور کورونا وبا کے سبب طلبا کا تعلیمی نقصان اور ڈراپ آؤٹ تیزی سے ہوتا جارہا ہے۔ اس سلسلے میں انہوں نے کہا کہ اس سیمینار سے تمام اساتذہ کو یہ ہدایت ملی ہے کہ طلباء کے تعلیمی نقصان اور ڈراپ آؤٹ جیسے مسائل کو کس طرح سے حل کیا جاسکتا ہے۔ واضح رہے کہ اس پروگرام میں شہر کی اردو میڈیم، انگلش میڈیم اور مراٹھی میڈیم کے اساتذہ موجود رہے۔
