ڈاکٹر اقبال بَرکی کا اردو ناول 'شہزادہ پرویز عالم' اور انگریزی زبان میں تحریر کردہ کتاب 'دی ٹورٹوائز ہو کِلس دی لائن اینڈ ادر اسٹوریز' کا اجراء شہر کی معروف شخصیات مختار قریشی اور ایڈووکیٹ عتیق الزماں زبیری کے ہاتھوں عمل میں آیا۔
واضح رہے کہ ڈاکٹر اقبال بَرکی شہر کے معروف ادیب، کہانی کار اور خاص طور سے بچوں کی نفسیات کے مطابق سائنسی، تحقیقی، معلوماتی اور سبق آموز کہانیوں پر ملکہ رکھتے ہیں۔
ادب اطفال پر ڈاکٹر اقبال بَرکی کی تقریباً دیڑھ درجن کتابیں اب تک منظر عام پر آچکی ہیں جس میں ان کی کتاب 'عقلمند کچھوا' کو نیشنل بُک ٹرسٹ آف انڈیا کی جانب سے شائع کیا گیا اور ان کی اس کتاب کا آریہ، ہندی اور پنجابی زبان میں بھی ترجمہ کیا گیا۔ اس کے علاوہ ان کی ایک کتاب کو قومی کونسل برائے فروغ اردو زبان کی جانب سے بھی شائع کیا گیا ہے۔
تقریب اجراء کے موقع پر شہر کی تمام اہلِ ذوق شخصیات موجود تھیں اس کے علاوہ بیرون شہر کے بھی چند مہمان قلمکار شامل ہوئے۔
واضح رہے کہ سنہ 2003 میں اردو زبان کی خدمت کے لیے قائم کیا جانے والا ادارہ 'ادارہ نثری ادب' کی جانب اردو کے فروغ کے لیے ہر مہینے کے آخری سنیچر کو تقریب منعقد کی جاتی ہے جس میں شہر کے مختلف قلمکار اپنی ماہانہ تخلیق پیش کرتے ہیں اور دیگر سینیئر ادباء کی رائے لیتے ہیں۔
