اورنگ آباد:ریاست مہاراشٹر اردو ساہتیہ اکاڈمی میں سات آسامیاں منظور ہے۔اس میں فی الحال صرف ایک ہی آفس سپرنٹنڈنٹ کی جگہ پر کام کر رہا ہے۔ باقی چھ آسامیاں کلرک، ٹائپسٹ، ترجمان و دیگر آسامیوں پر کوئی ملازم نہ ہونے کی وجہ سے مہاراشٹر کے تمام ادب نواز افراد، شعراء اور ادیب اپنے ایوارڈ کے لیے درخواستیں کرتے ہیں۔ اسی طرح مشاعرے منعقد کروانے کے لیے مالی تعاون حاصل کرنے اور نئی کتابوں کی اشاعت کے لیے بھی مالی تعاون حاصل کرنے کے لیے درخواستیں دیتے ہیں مگر اب اس اکاڈمی میں اسٹاف نہ ہونے کی وجہ سے ان درخواستوں پر وقت پر کوئی بھی کارروائی نہیں ہو پا رہی ہے۔ اس کی وجہ سے ادیب و شعراء کرام کو بڑی دشواریوں کا سامنا کرنا پڑ رہا ہے۔
ان تکالیف کو دور کرنے کے لیے جن جاگرن سمیتی مہاراشٹر کے صدر نے اورنگ آباد ضلع کلکٹر کی معرفت وزیر اعلٰی کو ایک محضر پیش کیا۔ جس میں مطالبہ کیا گیا کہ اُردو اکاڈمی میں جو خالی آسامیاں ہیں انھیں جلد از جلد پر کیا جائے یا دیگر محکمات سے پروموشن پر تبادلے کرکے آسامیاں کو پر کیا جانا انتہائی ضروری ہے۔ ساتھ ہی اکاڈمی کا بجٹ ایک عرصہ سے ایک کروڑ اکتیس لاکھ روپے ہی ہے جو تلنگانہ، دہلی اور یوپی اکاڈمی کا دس فی صد ہی ہے۔ لہٰذا اس اکاڈمی کا بجٹ پانچ کروڑ سے زائد کیا جائے۔ اس طرح کا محضر پیش کیا گیا۔ اس موقع پر وفد کے کنوینر محسن احمد صدر جن جاگرن سمیتی مہاراشٹر کے ساتھ تعلیم یافتہ افراد بھی موجود تھے۔
رفیع الدین ناصر کا کہنا ہے کہ جن جاگرن سمیتی کے صدر محسن خان کی رہنمائی میں ایک وفد نے اورنگ آباد ضلع کلکٹر سے ملاقات کی اور میمورنڈم پیش کیا اور کہا کہ ہمارے گزارش مہاراشٹر حکومت تک پہنچائیں۔ ہم نے مہاراشٹر اسٹیٹ اردو ساہتیہ اکیڈمی کے تعلق سے ذکر کیا ہے۔ وہاں پر اسٹاف کی کمی ہے۔ ایک ہی شخص وہاں پر پورا کام انجام دے رہا ہے جب کہ سات افراد کی وہاں پر ضرورت ہے۔ بجٹ بہت کم ہے۔
یہ بھی پڑھیں:Banners for Muslim Girls مسلم دوشیزاؤں کی فلاح و بہبود کے لیے نصیحت آمیز بینر آویزاں
انہوں نے کہا کہ اس سے ہٹ کر جو سب سے اہم بات یہ ہے کہ ابھی تک مہاراشٹر اسٹیٹ اردو ساہتیہ اکیڈمی کی تشکیل نہیں ہوئی ہے جب کہ مہاراشٹر میں گجراتی، مرہٹی اور دیگر اکیڈمیوں کے بورڈس کی تشکیل ہو چکی ہے۔ اس لیے محسوس ہوتا ہے کہ اردو کے ساتھ بہت نا انصافی ہو رہی ہے جب کہ درحقیقت مہاراشٹر اسٹیٹ اردو ساہتیہ اکاڈمی ملک کی پہلی اکاڈمی ہے۔ اسی کی بُنیاد پر دہلی، بنگال، گجرات اور دیگر ریاستوں میں بھی اکاڈمی شروع کی گئی۔
