انیل دیشمکھ کے ناگپور میں واقع دفتر نے دھمکی آمیز کال وصول ہونے کی تصدیق کی جبکہ وزیر داخلہ نے اسمبلی اجلاس کے دوران کنگنا رناوت پر تنقید کی تھی جس کے بعد یہ کال وصول ہوا ہے۔
مہاراشٹرا کے وزیر داخلہ نے کہا تھا کہ ممبئی پولیس، ادھیایان سمن کے الزامات جس میں کہا گیا کہ اداکارہ کنگنا رناوت منشیات لیتی ہیں کے سلسلہ میں تحقیقات کرے گی۔ انہوں نے بتایا تھا کہ اداکار شیکھر سمن کے فرزند ادھیایان کے رناوت کے ساتھ تعلقات تھے جبکہ اس نے الزام عائد کیا ہے کہ اداکارہ منشیات کی عادی ہے۔
انیل دیشمکھ نے شیوسینا کے پرتاب سرنائک اور سنیل پربھو کے اسمبلی میں اٹھائے گئے سوالات کا جواب دیتے ہوئے کہا کہ ’کنگنا کے ادھیایان سمن سے تعلقات رہے ہیں جس نے اداکارہ پر منشیات لینے اور زبردستی پیش کرنے کا انکشاف کیا ہے۔ اس سلسلہ میں ممبئی پولیس تحقیقات کرے گی‘۔
وزیر داخلہ کے بیان کے پر ردعمل کا اظہار کرتے ہوئے کنگنا رناوت نے کہا کہ وہ پولیس سے مکمل تعاون کرنے اور خون کے نمونے پیش کرنے کےلیے تیار ہے۔
انہوں نے ٹوئٹ کیا کہ ’براہ کرم میرے خون کی جانچ کروائی جائے اور میرے فون کالس کی جانچ بھی کی جائے تاکہ میرے منشیات فروشوں سے تعلقات کا پتہ چل سکے۔ اگر میری کوئی غلطی ثابت ہوتی ہے تو میں ہمیشہ کےلیے ممبئی چھوڑ دوں گی‘۔
