ممبئی: شیوسینا شندے دھڑے کے 16 ایم ایل ایز کو نااہل قرار دینے کے سلسلے میں آج اسمبلی اسپیکر راہل نارویکر کے پاس سماعت ہے۔ اس سے قبل عدالت عظمیٰ نے مہاراشٹڑ میں اقتدار کی جدوجہد کے سلسلے میں شندے گروپ کے 16 ایم ایل ایز کو نااہل قرار دینے سے متعلق سماعت میں تاخیر کرنے پر ودھان سبھا اسپیکر راہل نارویکر کی سرزنش کی تھی۔ سپریم کورٹ نے، ایک ہفتے میں سماعت (ایم ایل اے کی نااہلی کا فیصلہ) منعقد کرنے، دوسرے ہفتے میں سماعت کا خاکہ بنانے اور دو ہفتوں کے بعد رپورٹ پیش کرنے کا حکم دیا تھا۔ اس کے بعد اسمبلی اسپیکر راہل نارویکر نے کام شروع کیا اور آج سے سماعت شروع ہوگی۔
شیو سینا کے دونوں دھڑوں کو نوٹس:
سپریم کورٹ کی ہدایت کے مطابق، ایک ہفتہ کے اندرارکان اسمبلی کی نااہلی کے معاملے سے نمٹنے کے لیے ایک پروگرام تیار کرنے کو کہا گیا تھا۔ اسی مناسبت سے اسمبلی اسپیکر راہل نارویکر نے شیوسینا کے 54 ارکان اسمبلی کو نوٹس جاری کیا ہے اور انہیں آج دوپہر کو سماعت کے لیے حاضر ہونے کو کہا ہے۔ اطلاعات سامنے آ رہی ہیں کہ نااہلی سے متعلق تمام درخواستوں کو یکجا کر کے نوٹس جاری کیا گیا ہے۔
گروپ سربراہان کو بلایا جائے:
شیوسینا کے دونوں گروپوں کو دستاویزات ایک دوسرے کے حوالے کرنے کا وقت دیا گیا ہے۔ اسی کے مطابق اس ہفتے ایک نئی سماعت کا اشارہ دیا گیا تھا۔ کہا گیا تھا کہ سپریم کورٹ کی ہدایت اور مقننہ کے قانون میں تاخیر نہیں کی جائے گی۔ درست فیصلہ کیا جائے گا۔ راہل نارویکر نے کہا کہ وہ جلد بازی میں کوئی فیصلہ نہیں لیں گے۔ نارویکر نے مزید کہا کہ اگر ضروری ہوا تو شیوسینا کے دونوں دھڑوں یعنی وزیر اعلیٰ ایکناتھ شندے اور ٹھاکرے دھڑے کے سربراہ ادھو ٹھاکرے کو سماعت کے لیے بلایا جا سکتا ہے۔ امکان ہے کہ شیوسینا کے دونوں دھڑوں کے 54 ارکان اسمبلی کو سماعت کا شیڈول دیا جائے گا۔ شیڈول کے مطابق دونوں گروپوں کے ایم ایل ایز کو سماعت کا سامنا کرنا پڑے گا۔
یہ بھی پڑھیں:بی جے پی کے لئے پارٹیوں کو توڑنے کی سیاست کوئی نئی بات نہیں: ادھو ٹھاکرے
سماعت براہ راست(LIVE) ہونی چاہئے:
قائد حزب اختلاف وجے وڈیٹیوار نے مطالبہ کیا ہے کہ شیوسینا ایم ایل اے کی نااہلی سے متعلق سماعت براہ راست منعقد کی جانی چاہئے۔ انہوں نے اس سلسلے میں اسمبلی سپیکر کو خط لکھا تھا۔ جس میں شیوسینا میں نااہل ایم ایل اے کیس کی سماعت براہ راست نشریات کے ذریعہ مہاراشٹر کے عوام کے سامنے کرنے کا مطالبہ کیا گیا ہے۔ ریاست کی تاریخ کے سب سے بڑے سیاسی بغاوت کیس میں ارکان اسمبلی کی نااہلی کا معاملہ اسمبلی اسپیکر کے سامنے زیر التوا ہے۔ جمہوری اور انصاف پسند مہاراشٹر کے لوگوں کی توجہ سماعت کی طرف ہے۔ ودیٹیوار نے مطالبہ کیا ہے کہ آئینی اداروں، آئینی عہدوں اور مجموعی جمہوری نظام پر عوام کا اعتماد برقرار رکھنے کے لیے ایم ایل اے نااہلی کیس کی سماعت کو براہ راست نشر کیا جانا چاہیے۔
