شدید بارش کے باعث ممبئی کے گورے گاؤں ڈنڈوسی میں نورانی مسجد کے قریب زمین کھسکنے کا واقعہ پیش آیا جس میں چار افراد زخمی ہوئے۔
ایک ہفتہ سے جاری موسلادھار بارش نے ممبئی میں عام زندگی شدید متاثر کی ہے وہیں دوسری جانب ممبئی کی لائف لائن کہی جانے والی لوکل ٹرینز کو زبردست متاثر کیا ہے.
ٹرینز کی گھنٹوں تاخیر کے سبب سبھی اشٹیشنوں پر مسافروں کا زبردست ہجوم دیکھا جارہا ہے اور مسافرین کو کافی مشکلات کا سامنا کرنا پڑ رہا ہے۔
شدید بارش کی وجہ سے بھیونڈی کی کامواری ندی میں طغیانی ہے اور ندی خطرے کے نشان سے اپر بہہ رہی ہے۔
بھیونڈی شہر سے ملحق کھاڑی پار رسولہ کا علاقے کا رابطہ پوری طرح ٹوٹ گیا ہے اور بھیونڈی شہر کا ممبئی ناسک شاہراہ سے رابطہ بند ہوچکا ہے۔
بارش کا زبردست پانی بھر جانے کے سبب پولیس انتظامیہ نے اس شاہراہ کو مکمل طور سے بند کردیا ہے. بھیونڈی تعلقہ سے گزرنے والی کالو ندی اور بھاتسا ندی میں آئی زبردست طغیانی کے سبب کئی گاؤں سے آمد و رفت کا سلسلہ پوری طرح بند ہے۔
