'میں کسی کا بھی حق چھیننے نہیں دوں گا'

مہاراشٹر کے وزیراعلی ادھو ٹھاکرے نے ریاست کے عوام سے اپیل کی ہے کہ 'وہ شہریت ترمیمی قانون کا خوف اپنے دل سے نکال دیں اور ریاست میں امن و امان برقرار رکھیں۔'

ناگپور اسمبلی کے باہر ادھو ٹھاکرے نے میڈیا سے خطاب کرتے ہوئے کہا کہ 'شہریت ترمیمی قانون بن جانے کے بعد سے پورے ملک میں ایک خوف کا ماحول پیدا ہوگیا ہے'۔

انہوں نے کہا کہ 'ملک کے چند علاقوں میں تشدد کے واقعات رونما ہوئے ہیں۔ ریلیز نکالی جارہی ہیں اور کچھ لوگوں کو شبہ ہے کہ اس قانون کے نافذ ہوجانے کے بعد کیا انہیں ان کے گھر، ریاست اور ملک سے نکال دیا جائے گا لیکن میں انہیں یقین دلاتا ہوں کہ ریاستی حکومت کسی کو بھی ان کا حق چھیننے نہیں دے گی۔'

انہوں نے ریاست کے عوام سے اپیل کی ہے کہ 'مہاراشٹر میں امن و امان برقرار رکھیں اور عوام کو اس تعلق سے جو کچھ کہنا ہے وہ ضرور کہیں اور وہ لوگوں کی بات سنیں گے۔'