مہاراشٹر کے دارالحکومت ممبئی سے متصل کلیان میں ایک مکان میں بطور پینگ گیسٹ رہنے والے شخص نے اسی مکان مالک کے لاکر میں رکھے لاکھوں کے طلائی زیورات پر ہاتھ صاف کر کےایک فائنانس کمپنی سے گولڈ لون لیکر فرار ہوگیا، اس شاطر ملزم کو کلیان پولیس نے گرفتار کرکے لاکھوں روپے کے زیورات برآمد کرنے کا دعویٰ کیا ہے۔
پولیس ذرائع سے موصولہ اطلاعات کے مطابق کلیان شہر میں رہائش پذیر مہیش جوشی نامی شخص کے مکان میں کوستبھ کلکرنی نامی نوجوان بطور پینگ گیسٹ رہ رہا تھا۔ اس نے موقع پاتے ہی تین لاکھ روپے مالیت کے زیورات چوری کرکے بدلاپور واقع موتھوڈ کارپ فائنانس کمپنی سے گولڈ لون لیکر فرار ہوگیا تھا۔
مہیش جوشی کی شکایت پر کلیان بازار پیٹھ پولیس نے مقدمہ درج کرکے ریاست کے احمد نگر کے سنگم نیر علاقے سے ملزم کوستبھ کلکرنی کو گرفتار کرکے اس کی نشاندہی پر موتھوڈ فائنانس کمپنی سے پولیس زیورات برآمد کرتے ہوئے ملزم کلکرنی کو جیل کی سلاخوں کے پیچھے بھیج دیا ہے۔
