اورنگ آباد میں سیلفی پوائنٹ کا امتیاز جلیل کے ہاتھوں افتتاح

اورنگ آباد سے رکن پارلیمان امتیاز جلیل کا کہنا ہے کہ مسلمان اب خوف کی سیاست سے ابھر رہا ہے اور بہار کا نتیجہ اس کی عملی مثال ہے ساتھ ہی انھوں نے یہ بھی کہا کہ مسلمانوں نے خود ساختہ سیکولر پارٹیوں کو کرارا جواب دیا ہے۔

مہاراشٹر کے شہر اورنگ آباد میں مجلس اتحاد المسلمین کے رکن پارلیمان امتیاز جلیل کے ہاتھوں سیلفی پوائنٹ کا افتتاح کیا گیا۔

ایم آئی ایم کے رکن پارلیمان امتیاز جلیل نے جمعرات کے روز کہا ہے کہ مسلمان اب خوف کی سیاست سے ابھر رہا ہے اور اب مسلم طبقہ کو اپنی اہمیت کا اندازہ ہونے لگا ہے، بہار کے حالیہ نتائج اس کی بہترین مثال ہے۔

رکن پارلیمان امتیاز جلیل اورنگ آباد شہر میں ایک سیلفی پوائنٹ کی تقریب میں شریک تھے اس موقع پر 'آئی لو اورنگ آباد' سیلفی پوائنٹ کا افتتاح بھی امتیاز جلیل کے ہاتھوں عمل میں آیا۔

ایم آئی ایم رہنما نے شہر اورنگ آباد کے نوجوانوں کے اس اقدام کی ستائش کی اور کہا کہ ایسے اقدامات سے نوجوانوں میں جوابدہی اور ذمہ داری کا احساس پیدا ہوگا۔

واضح رہے اورنگ آباد کے چند نوجوانوں نے آئی لو اورنگ آباد تحریک شروع کی ہے اور بلا تفریق مذہب و ملت ضلع بھر کے نوجوان اس تحریک سے جڑ رہے ہیں ۔