پولیس کمشنر کا چارج سنبھالنے کے بعد پریس کانفرنس میں ہیمنت نگرالے نے کہا کہ ممبئی پولس نازک اور ناگفتہ بہ حالات سے گزر رہی ہے۔ ان حالات میں تمام پولس افسران کے تعاون سے حالات سازگار بنانے کے لیے ریاستی حکومت نے میری تقرری کی ہے۔
انہوں نے کہا کہ 'جس طرح سے ممبئی پولس کی شبیہ خراب ہوئی ہے اسے بہتر بنانے کی میں ہر ممکن کوشش کروں گا اور اس کے لیے تمام لوگوں کا تعاون ازحد ضروری ہے۔
ہیمنت نگرالے نے سچن وازے کا نام لیے بغیر امبانی کیس پر تبصرہ کرتے ہوئے کہا کہ جو بھی اس کیس میں ملوث ہے اس پر کارروائی ہوگی، کسی کو بھی بچانے کی کوشش نہیں کی جائے گی۔
انہوں نے مزید کہا کہ 'اس معاملے کی تفتیش این آئی اے اور اے ٹی ایس کر رہی ہے۔ تفتیش پر ابھی کچھ کہنا مناسب نہیں ہے۔ میں ممبئی شہر میں ایڈیشنل کمشنر اور جوائنٹ پولس کمشنر انتطامیہ کے طور پر ذمہ داری سنبھال چکا ہوں۔ لہذا یہاں کے حالات سے واقفیت رکھتا ہوں۔
ریاست حکومت کا شکریہ ادا کرتے ہوئے نگرالے نے کہا کہ حکومت نے ایسے حالات میں مجھے موقع دیا جب ممبئی پولس کی شبیہ خراب ہوئی ہے اور اس شبیہہ کو دوبارہ صحیح کرنا نیز عوام کا اوتماد حاصل کرنا میرا ترجیحی کام ہوگا کیونکہ ابھی ممبئی پولس کے جو حالات ہیں وہ انتہائی نازک ہیں اور ایسے حالات کا مقابلہ کرنا میری ذمہ داری اور ترجیحات میں شامل ہے میں سب کو ساتھ لے کر کام کروں گا۔
