شہر کے شاہراہ دو سے چار فٹ تک بارش کا پانی جمع ہونے سے شہریوں میں کارپوریشن کے تئیں شدید ناراضگی پائی جا رہی ہے۔
گذشتہ روز'گنپتی وسرجن' کرنے والے منڈلوں کو شدید مشکلات کا سامنا کرنا پڑا، سڑک پر ہونے والے گڈھوں کو لے کر عقیدت مند اس میں گرتے رہے اور گڈھوں کا پانی لوگوں کے اوپر آرہا تھا۔
شہر سے متصل شیلارگاؤں میں متعدد مکانوں، دکانوں اور شہر کے نشیبی علاقے میں واقع پاورلوم کے کارخانوں میں بارش کا پانی داخل ہوگیا، جس سے لاکھوں کی املاک برباد ہونے کی اطلاع موصول ہورہی ہے۔
گزشتہ کئی دنوں سے ہورہی بارش نے شہریوں کی زندگی کو مفلوج بنادیا ہے۔
بارش کا پانی شاہراہوں پر جمع ہونے کے سبب ممبئی ناسک شاہراہ، انجور پھاٹا سے احمدآباد اور بھیونڈی واڈرہ شاہراہ پر ٹریفک نظام پورے دن درہم برہم تھا۔
شہریوں اور بیرونی شہر جانے والے مسافروں کو شدید دشواریوں کا سامنا کرنا پڑا ہے۔
اس کے علاوہ دیہی علاقے میں بھاتسا اور کالو ندی سمیت کنارے آباد گاؤں میں بارش کا پانی داخل ہوگیا۔
جب کہ شہر کے نشیبی علاقے زیرِ آب ہوگئے، اس صورتحال کے سبب یومیہ اجرت کرکے اہل خانہ کی کفالت کرنے والے افراد کے سامنے روزی روٹی کی دشواری پیش آرہی ہے۔
کامواری ندی کے کنارے آباد مہاڑا کالونی، ندی ناکہ، شیلار، عیدگاہ روڈ، تکیہ امانی شاہ سمیت متعدد علاقوں میں کئی فٹ تک بارش کا پانی جمع ہوگیا۔
شہر کی سڑکیں نالوں میں تبدیل ہوگئی۔ جونا آگرہ روڈ، تین بتی، بازار پیٹھ، درگاہ، نظام پورہ، روڑ اعظمی نگر، فیضان کمپاؤنڈ، غیبی نگر،باولا کمپاؤنڈ، سلامت پورہ، عام پاڑہ سمیت مختلف علاقوں میں شہریوں سیلابی کیفیت کا شکار ہونا پڑ رہا ہے۔
