اورنگ آباد: ریاست مہاراشٹر کے اورنگ آباد شہر میں واقع چکل تھانہ انٹرنیشنل ائر پورٹ امبارگیشن پوائنٹ سے حج 2023 کے لئے مراٹھواڑہ کے 1700 عازمین حج راست جدہ کے لئے روانہ ہونے والے ہے لیکن اورنگ آباد امبار کیشن پوائنٹ سے جانے والے حاجیوں کو 88 ہزار روپے فی حاجی زائد ادا کرنے ہوں گے، جس کو لے کر حج عازمین میں ناراضگی دیکھی جا رہی ہے۔
اس معاملے پر ایم آئی ایم سربراہ اسد الدین اویسی نے کہا کہ اورنگ آباد سے فریضہ حج پر روانہ ہونے والے عازمین حج کے کرائے میں کمی ہونی چاہیے، اس تعلق سے ضرورت پڑی تو مرکزی وزارت سے بات کی جائے گی۔ اویسی نے ایم پی امتیاز جلیل کی حمایت کرتے ہوئے کہا کہ اورنگ آباد سے روانہ ہونے والے حاجیوں کا ایئر ٹکٹ کرایہ کم ہونا چاہیے تاکہ ہر کسی کو فریضہ حج کی سعادت نصیب ہوسکے۔
واضح رہے بامبے امبارکیشن پوائنٹ سے روانہ ہونے والے عازمین حج کا کرایہ تین لاکھ پانچ ہزار ہے جبکہ اورنگ آباد امبارکیشن پوائنٹ سے روانہ ہونے والے عازمین حج سے 88 ہزار روپے اضافی طلب کیے جارہے ہیں، جس کی وجہ سے عازمین حج پریشان ہیں۔ اگر کرایہ میں کمی نہیں ہوتی ہے تو کئی عازمین فریضہ حج سے محروم ہوسکتے ہیں۔
اسد الدین اویسی کی مانگ پر حکومت کیا اقدام کرتی ہے، اس پر عازمین کی نگاہیں مرکوز رہے گی۔ حج کے سفر کے لیے ٹینڈر نکالا گیا تھا اور ایئر کرافٹ کمپنی نے بولی لگائی تھی، جس کے بعد گو ایئر کو ٹینڈر دیا گیا تھا۔ اب گو ائیر نے اپنے آپ کو دیوالیہ ہونے کا اعلان کرنا کردیا ہے اور کہا ہے کہ اب ہمارے پاس پیسہ نہیں ہے اور ہم پرواز نہیں کریں گے۔ جس وجہ سے دوسری ہوائی جہاز کمپنیاں زیادہ کرایہ وصول کرنے کی کوشش کر رہی ہیں۔
