مہاراشٹر کے وزیر اعلی ادھو ٹھاکرے نے پالگھر اسپتال میں آتشزدگی کے واقعے کی جانچ کا حکم دیا ہے۔
وزیر اعلی نے ایک بیان میں کہا کہ '' آتشزدگی کی وجہ کی مناسب جانچ ہونی چاہیے۔ انہوں انتظامیہ کو اس بات کی بھی جانچ کرنے کی ہدایت دی ہے کہ اسپتال میں فائر سیفٹی کے مناسب انتظامات تھے یا نہیں۔''
ادھو ٹھاکرے نے مریضوں کی موت پر افسوس کا اظہار کیا اور آتشزدگی سے متاثرہ مریضوں کی جلد صحت یابی کے لیے نیک تمناؤں کا اظہار کیا۔
وزیر اعلی نے اس واقعہ کو سنجیدگی سے نوٹس لیتے ہوئے افسران سے بات کی۔ انہوں نے آگ کو مکمل طور پر بجھانے ہدایت دینے کے ساتھ کہا کہ اسپتال میں زیر علاج دیگر مریضوں کا علاج بھی متاثر نہ ہونے پائے۔
جمعہ کی صبح پالگھر ضلع کے ویرار میں ایک COVID-19 سینٹر میں بھیانک آتشزدگی سے کورونا کے کم از کم 14 مریضوں کی موت ہوگئی۔ یہ واقعہ وجے ولبھ اسپتال میں پیش آیا جو وسائی بلدیہ کے حدود میں واقع ہے۔
اسپتال کے سی ای او کے مطابق رات کے تقریباً 3.15 بجے اسپتال کے آئی سی یو میں آگ بھڑک اٹھی۔ اس استپال میں کل 90 مریض زیر علاج تھے لیکن آئی سی وی میں صرف 17 کورونا مریضوں کا علاج کیا جارہا تھا، ان میں سے 14 مریضوں کی موت ہو گئی ہے۔ متاثرہ مریضوں کو دوسری اسپتالوں میں منتقل کر دیا گیا ہے۔
ابتدائی جانچ کے مطابق بتایا جا رہا ہے کہ آگ لگنے کی وجہ ایئرکنڈیشن سسٹم میں شارٹ سرکٹ ہو سکتی ہے۔ پولیس معاملے کی جانچ میں مصروف ہے۔
اس سے قبل آکسیجن سپلائی بند ہونے سے ناسک کے ڈاکٹر ذاکر حسین اسپتال میں 22 مریضوں کی موت ہو گئی تھی۔ اس کے بعد ویرار میں پیش آئے اس حادثے نے لوگوں کو ہلا کر رکھ دیا ہے۔
