مہاراشٹر کے ضلع اورنگ آباد میں سابق وزیراعلی اور موجودہ اپوزیشن رہنما دیویندر فڑنویس نے ایکناتھ کھڑسے کے الزامات پر صفائی دیتے ہوئے کہا کہ 'پارٹی چھوڑتے وقت کسی کو تو ویلن بنایا جانا تھا تو انہوں نے مجھے ویلن بنا دیا، کھڑسے نے جو پہلو پیش کیے ہیں وہ آدھا سچ ہے'۔
دیویندر فڑنویس نے اورنگ آباد میں ایک پریس کانفرنس کے ذریعے کہا کہ کھڑسے نے مجھے ویلن بنا کر پیش کیا ہے۔ اگر مجھ سے کوئی تکلیف تھی تو پارٹی کے سینیئر قائدین سے بات کرنی چاہیے تھی، ان کا پارٹی سے استعفیٰ دینا افسوسناک ہے میں اس ضمن میں ابھی کچھ نہیں کہہ سکتا۔
فڑنویس نے ایکناتھ کھڑسے کے استعفی پر کہا کہ بی جے پی ایک بڑی اور قومی پارٹی ہے جس میں کسی کے آنے اور جانے سے پارٹی بڑی یا چھوٹی نہیں ہوتی ہے اور مہاراشٹر کے جلگاؤں میں بی جے پی کی کافی مضبوط پکڑ ہے۔ اس کے بعد فڑنویس جمعرات کے روز بہار میں بی جے کی متعدد ریلیوں سے خطاب کرنے کے لیے روانہ ہوگئے۔
واضح رہے کہ بدھ کے روز ایکناتھ کھڑسے جلگاؤں میں منعقدہ ایک تقریب میں باقاعدہ طور پر پارٹی سے استعفی دے دیا تھا اور اب وہ جلد ہی این سی پی میں شامل ہونے والے ہیں۔
کھڑسے نے یہاں الزام عائد کیا تھا کہ انھی بی جے پی کی طرف سے کوئی پریشانی نہیں ہے لیکن دیویندر فڑنویس سے انھیں شکایت ہے۔
