ممبرا شہر کے امرت علاقے میں ایک ہاؤسنگ سوسائٹی میں رہائش پزیر ایک شخص کے کورونا وباء کی زد میں آنے کے بعد اس وبائی وائرس سے متاثر پہلا مریض ملنے سے پورے شہر میں افرا تفری کا ماحول ہے۔
فی الحال متاثرہ شخص کو تھانے سول ہسپتال میں داخل کرایا گیا ہے، جبکہ اہل خانہ کے تمام افراد سمیت عمارت میں رہائش پذیر افراد کو بھی مقامی انتظامیہ نے کورنٹائن کردیا ہے۔
بتایا جاتا ہے کہ کورونا وائرس سے متاثرہ شخص جو ممبئی کے ایک پرنٹنگ پریس میں نوکری پیشہ تھا، گزشتہ کچھ دنوں سے اسے بخار اور کھانسی کی شکایت تھی دوا کے بعد بھی افاقہ نہ ہونے پر ڈاکٹرز نے کورونا وائرس کا ٹیسٹ کرایا، جس کی رپورٹ پازیٹو آنے کے بعد مقامی انتظامیہ فوراً حرکت میں آگئی۔
فی الحال مذکورہ علاقے میں آمدورفت پر مکمل طور سے پابندی عائد کردی گئی ہے، ممبرا کے مقامی رکن اسمبلی ریاست مہاراشٹر کے کابینی وزیر جتیندر اوہاڈ نے افسوس کا اظہار کرتے ہوئے شہریوں سے اپیل کی کہ وہ گھروں میں رہیں، بلا وجہ گھروں سے باہر نہ گھومیں کیونکہ اس وباء کی زد میں ایک شخص آچکا ہے۔ ابھی بھی وقت ہے لاک ڈاؤن کو مکمل طور سے فالو کریں۔
واضح ہوکہ تھانے میونسپل کارپوریشن کی حد میں 14 کلیان ڈومبیولی میونسپل کارپوریشن کی حدود میں 20، نوی ممبئی میونسپل کارپوریشن کے علاقے میں 22 جبکہ الہاس نگر میں ایک، میرا بھائندر میں چھ اور تھانے دیہی علاقے میں تین کورونا وائرس سے متاثر افراد ہیں۔ جو ممبئی اور تھانے کے مختلف ہسپتالوں میں زیرِ علاج ہیں۔
جبکہ بھیونڈی میں ابھی تک ایک بھی کورونا متاثرہ شخص کی تشخیص نہیں ہوسکی ہے۔
