مرکزی صحت اور خاندانی بہبود کی وزارت کی جانب سے ہفتہ کو جاری تازہ ترین اعداد و شمار کے مطابق ملک کی مختلف ریاستوں اور مرکز کے زیر انتظام علاقوں میں اس کے انفیکشن سے اب تک 1،73،763 افراد متاثر ہوئے ہیں اور 4971 افراد ہلاک ہوئے ہیں۔ ملک میں 82،370 لوگ اس بیماری سے نجات حاصل کرنے میں کامیاب ہوئے ہیں اور اب یہاں کورونا وائرس انفیکشن کے 86 ہزار 422فعال معاملے ہیں۔
اس وبا سے ملک میں سب سے زیادہ متاثر ریاست مہاراشٹر ہوا ہے۔ ریاست میں گزشتہ 24 گھنٹوں میں 2682 نئے کیسز سامنے آئے ہیں اور 116 افراد کی موت ہوئی ہے جس کے ساتھ ہی ریاست میں اس سے متاثر ہونے والے افراد کی کل تعداد بڑھ کر 62 ہزار 228اور اس جان لیوا وائرس سے ہلاک ہونے والوں کی تعداد بڑھ کر 2098 ہو گئی ہے۔ اس دوران ریاست میں ریکارڈ 8381 لوگ شفایاب ہوئے ہیں جس سے صحت مند ہونے والوں کی کل تعداد 26997 ہو گئی ہے۔
کورونا وائرس سے متاثر ہونے کے معاملہ میں تامل ناڈو دوسرے نمبر پر ہے، جہاں اس کی تعداد 20 ہزار سے زائد ہو چکی ہے۔ یہاں اب تک 20،246 افراد اس وبا سے متاثر ہوئے ہیں اور 154 افراد کی موت ہوئی ہے جبکہ 11،313 لوگوں کو علاج کے بعد مختلف اسپتالوں سے چھٹی مل چکی ہے۔
کورونا وائرس سے قومی دارالحکومت دہلی کی بھی حالت کافی تشویشناک بنی ہوئی ہے اور ملک میں سب سے زیادہ متاثر ریاستوں میں تیسرے نمبر پر ہے۔ دہلی میں 17،386 افراد متاثر ہیں اور 398 افراد کی جان جا چکی ہے جبکہ 7846 مریضوں کو علاج کے بعد اسپتالوں سے چھٹی دے دی گئی ہے۔
كووڈ -19 سے متاثر ہونے کے معاملہ میں ملک کی مغربی ریاست گجرات چوتھے نمبر پر ہے۔گجرات میں اب تک 15،934 لوگ اس وبا سے متاثر ہوئے ہیں اور 980 افراد ہلاک ہوئے ہیں۔ اس کے علاوہ 8611 افراد اس بیماری پر قابو پانے میں کامیاب ہوئے ہیں۔
راجستھان میں بھی کورونا وائرس پھیلتا جارہاہے اور یہاں اس کے متاثرین کی تعداد 8365 ہو گئی ہے اور 184 افراد کی موت ہو چکی ہے، جبکہ 5244 افراد صحتیاب ہوئے ہیں۔
آبادی کے لحاظ سے ملک کی سب سے بڑی ریاست اتر پردیش میں اب تک 7284 افراد کورونا وائرس کی زد میں آئے ہیں اور 198 افراد کی موت ہوئی ہے جبکہ 4244 لوگ اس وبا ٹھیک ہوئے ہیں۔
مغربی بنگال میں 4813 لوگ کورونا وائرس سے متاثر ہوئے ہیں اور 302 افراد کی موت ہو چکی ہے جبکہ 1775 افراد صحتیاب ہوئے ہیں۔ تلنگانہ میں اب تک کورونا وائرس سے 2425 افراد متاثر ہوئے ہیں اور 71 افراد نے کوروناوائرس کی وجہ سے جان گنوائی ہے۔ اس کے علاوہ یہاں 1381 افراد اب تک اس بیماری سے ٹھیک ہوئے ہیں۔
جنوبی بھارت کی ریاست آندھرا پردیش میں 3436 اور کرناٹک میں 2781 لوگ متاثر ہوئے ہیں اور ان ریاستوں میں اس وبا سے مرنے والوں کی تعداد بالترتیب 60 اور 48 ہے۔ مرکز کے زیر انتظام جموں و کشمیر میں متاثرین کی تعداد بڑھ کر 2164 ہو گئی ہے اور 28 اموات ہوئی ہے۔ پنجاب میں 42، ہریانہ میں 19، بہار میں 15، کیرالہ میں آٹھ، اڑیسہ میں سات، ہماچل پردیش، جھارکھنڈ اور اتراکھنڈ میں پانچ پانچ، آسام اور چنڈی گڑھ چار چار اور چھتیس گڑھ اور میگھالیہ میں اس وبا سے ایک ایک شخص کی موت ہوئی ہے۔
