مہاراشٹر کے پاورلوم صنعتی شہر بھیونڈی کے کلیان ناکہ سے سائی بابا تک ایم ایم آر ڈی اے کے ذریعہ نو تعمیر شدہ فلائی اوور افتتاح سے قبل تنازع کا شکار ہوگیا ہے۔
اس فلائی اوور کے افتتاح کو لیکر مئیر پرتیبھا ولاس پاٹل کے فیس اکاونٹ پر ہفتے کی صبح ایک پوسٹر اپ لوڈ ہونے بعد سے شہر میں زبردست سیاسی ہنگامہ ہوا۔
آنجہانی بالا صاحب ٹھاکرے کے نام سے منسوب نو تعمیر فلائی اوور کا وزیر اعلیٰ ادھو ٹھاکرے کے ہاتھوں 21 ستمبر کو افتتاح کی جانکاری مئیر شہر نے دیتے ہوئے فیس بک اکاؤنٹ پر اسکا پوسٹر اپ لوڈ کیا۔ جس میں وزیر اعلیٰ ادھو ٹھاکرے، نگراں وزیر ایکناتھ شندے, رکن پارلیمان کپل پاٹل ،رکن اسمبلی حلقہ مہیش چوگلے میئر پرتیبھا ولاس پاٹل اور ڈپٹی میئر عمران والی محمد خان تصویر والی اس پوسٹ کے وائرل ہوتے ہی شہر کے مسلمانوں نے شدید ناراضگی ظاہر کرتے ہوئے اس پوسٹ پر سوال کرنا شروع کردیا کہ آخر مقامی رکن اسمبلی رئیس شیخ کا نام اس تصویر میں کیوں نہیں ہے؟
شہریان نے سوال کیا کہ عوام کے ذریعے منتخب ہونے والے رکن اسمبلی کے ساتھ ایسا تعصب کیوں کیا جارہا ہے۔ دعوت نامہ کے تنازع پر شہر کے سیاسی حلقوں میں پورے دن تصویر اور رکن اسمبلی کے نام نہ شائع ہونے کو لیکر بحث کا بازار گرم رہا۔ ہر کوئی اس عمل کو سیاسی رقابت تعصب، مسلم دشمنی کے نظریہ سے دیکھ رہا ہے۔ مسلم رکن اسمبلی کے پروٹوکول کی خلاف ورزی کرنے کا معاملہ سوشل میڈیا پر زبردست شدت اختیار کرچکا ہے۔ اس دعوت نامہ کے تنازع پر رکن اسمبلی رئیس شیخ نے کہاکہ انکے پروٹوکول کی کھلی خلاف ورزی کی گئی ہے۔ جس کو لیکر انہوں نے ایم ایم آر ڈی سے لیکر ودھان سبھجا اسپیکر تک کو مکتوب بھیجا۔بعد ازیں دیر شام ایم ایم آر ڈی اے نے اس افتتاحی تقریب کو ملتوی کردیا۔
دوسری جانب دوپہر تقریباً ایک بجے بی جے پی کے رکن اسمبلی مہیش چوگلے نے فلائی اوور کی تقریب کے دعوت نامہ میں نام نہ ہونے کو لیکر شدید ناراضگی کرتے ہوئے اس کا افتتاح کردیا۔
ڈپٹی میئر عمران خان کے مطابق اس طرح کی کوئی تقریب ہونے والی تھی اس کی انہیں کوئی جانکاری نہیں ہے. جبکہ ایم ایم آر ڈی نے اس تقریب کے ملتوی کرنے کو لیکر باقاعدہ مکتوب جاری کیا اس سے صاف ہوگیا ہے کہ یہ تقریب ہونے والی تھی مگر دعوت نامہ کے تنازع کی وجہ سے اسے ملتوی کردیا گیاہے۔
وہیں کانگریس پارٹی اقلیتی شعبہ کے ترجمان سینئر رہنما اقبال صدیقی نے فیس بک پر اس متنازع دعوت نامہ کو آپ لوڈ کر لکھا کہ اگر کارپوریشن نے آفیشل اس طرح کا دعوت نامہ یا ہورڈنگ تیار کیا ہے جس میں رکن اسمبلی کا نام نہیں ہے تو وہ اس کی مذمت کرتے ہیں۔
یہ بھی پڑھیں:ممبئی میں دوبارہ لاک ڈاؤن نافذ کئے جانے کی تردید
