ناگپور: کانگریس نے جمعرات کو مہاراشٹر کے ناگپور میں ایک ریلی کے دوران کراؤڈ فنڈنگ کے لیے کرسیوں کے پیچھے بار کوڈ لگائے۔ کانگریس نے کراؤڈ فنڈنگ مہم کا نام 'ڈونیٹ فار دیش' رکھا تھا۔ ریلی میں شریک کانگریس کارکنوں اور عام لوگوں کے لیے گراؤنڈ میں بچھائی گئی کرسیوں کے پیچھے ایک بار کوڈ چسپاں کیا گیا۔ اس کے ذریعہ 'ہیں تیار ہم' ریلی کے شرکاء سے چندہ دینے کی اپیل کی گئی۔
کرسیوں کے پیچھے لگے پمفلٹ میں بار کوڈ کے ساتھ راہول گاندھی کی تصویر بھی تھی۔ پمفلٹ میں لکھا تھا، "بہتر بھارت کی تشکیل کے لیے 138 سال کی اس جدوجہد میں، کانگریس کو آپ کی ضرورت ہے۔ بھارت کو آپ کی ضرورت ہے۔ عطیہ کرنے کے لیے ابھی اسکین کریں۔" پمفلٹ میں مزید بتایا گیا تھا کہ تمام عطیہ دہندگان میں سے پانچ "خوش قسمت عطیہ دہندگان" کو راہل گاندھی کے ہاتھوں سرٹیفکیٹ سے نوازا جائے گا۔
راہل گاندھی نے 'ہیں تیار ہم' ریلی میں اپنے خطاب میں اس اعتماد کا اظہار کیا کہ کانگریس مہاراشٹر اور پورے ملک میں انتخابات میں کامیابی حاصل کرے گی۔ گاندھی نے کہا، "یہ نظریات کی لڑائی ہے۔ ہم مل کر مہاراشٹر اور ملک میں الیکشن جیتنے جا رہے ہیں۔" کانگریس لیڈر نے اپنے خطاب کے دوران اس بات کا بھی ذکر کیا کہ ملک میں دو مخالف نظریات کے درمیان تصادم جاری ہے۔ انھوں نے کہا کہ، ملک میں نظریات کی جنگ چل رہی ہے، لوگ سمجھتے ہیں کہ یہ سیاسی لڑائی ہے، اقتدار کی لڑائی ہے، لیکن اس لڑائی کی بنیاد نظریے کی ہے، دو متضاد نظریات کی ہے۔
یہ بھی پڑھیں:کانگریس میں ہر شخص کی بات سنی جاتی ہے، راہل
کانگریس لیڈر جے رام رمیش کے مطابق "ملیکارجن کھرگے اور راہل گاندھی نے ناگپور کی ریلی سے 2024 کے لوک سبھا انتخابات کا بگل بجا دیا ہے۔ 4 جنوری 2024 کو دہلی میں پی سی سی صدر اور سی ایل پی لیڈروں کی میٹنگ ہوگی۔ اور راہل گاندھی کی قیادت میں شروع ہونے والی بھارت نیائے یاترا کے روڑ میپ کو حتمی شکل دی جائے گی۔
