ممبئی: مہاراشٹر کانگریس کے صدر نانا پٹولے نے کہا کہ کانگریس رہنما راہل گاندھی ملک کی آواز بن گئے ہیں کیونکہ وہ عوام کے مسائل اٹھاتے رہے ہیں اور مودی حکومت پر سوال اٹھاتے رہے ہیں۔ انہوں نے کہا کہ ہمارے رہنما کے خلاف انتقامی کارروائی کے بعدکانگریس کارکنان جارحانہ موقف اختیار کر رہے ہیں۔ ہم اس کارروائی کو برداشت نہیں کریں گے، مرکزی حکومت کے خلاف ہماری جدوجہد جاری رہے گی۔
مرکزی حکومت کے ذریعہ راہل گاندھی کے خلاف شروع کی گئی ای ڈی تحقیقات کے خلاف آج نانا پٹولے کی قیادت میں راج بھون میں ایک بڑا مارچ نکالا گیا۔ لیجسلیچر پارٹی لیڈر اور وزیر محصولات بالاصاحب تھورات، تعمیرات عامہ کے وزیر اشوک چوان، وزیر توانائی ڈاکٹر نتن راوت، ماہی پروری کے وزیر اسلم شیخ، خواتین اور بچوں کی بہبود کی وزیر یشومتی ٹھاکر، وزیر تعلیم ورشا گائیکواڑ، طبی تعلیم کے وزیر امت دیشمکھ، زراعت کے ریاستی وزیر وشواجیت کدم، ممبئی کانگریس کے صدر بھائی جگتاپ اور دیگر افراد نے شرکت کی۔
نانا پٹولے نے صحافیوں کو بتایا کہ وزراء، اراکین پارلیمان، اراکین اسمبلی اور خواتین کارکنان کو پولیس کے ذریعہ مارا پیٹا جارہا تھا جبکہ کانگریس بی جے پی حکومت کی سیاسی انتقامی کارروائیوں کے خلاف سڑکوں پر احتجاج کررہی تھی۔ آج ملک کا برا حال ہے۔ بی جے پی حکومت کے خلاف شدید عدم اطمینان کا اظہار کیا جا رہا ہے۔
یہ بھی پڑھیں: Vanchit Bahujan Aghadi Protest in Mumbai: ونچت بہوجن اگھاڑی کے مظاہرے کی رضا اکیڈمی حمایت نہیں کرے گی
یو این آئی
