شہر مالیگاؤں میں کورونا متاثر مریضوں کے مسلسل اضافے کے خوف کی وجہ سے کارپوریشن محکمہ کے حفظان صحت کے کارکنان شہر میں صاف صفائی کا کام انجام نہیں دے رہے ہیں۔
مالیگاؤں کارپوریشن کے کمشنر ترمبک کاسار نے میڈیا کو بتایا کہ ایسے تمام کارکنان کو نوٹس جاری کی گئی ہے کہ وہ کام پر لوٹیں ورنہ انہیں معطل کردیا جائے گا۔
انہوں نے کہا کہ جلد ہی شہر کے گلی محلوں میں صاف صفائی اور کچرے کی گاڑیاں بھیجی جائیں گی۔
واضح رہے جن علاقوں میں کورونا مریض پائے گئے ہیں ان علاقوں میں صاف صفائی نہیں کی جا رہی ہے اور کئی روز سے وہاں سے کوڑا کرکٹ بھی نہیں اٹھایا گیا ہے جس کی وجہ سے شہر کے کورونا متاثر علاقوں میں گندگی کا انبار نظر آرہا ہے جس کی وجہ سے پورے علاقے کے لوگوں کو پریشانی کا سامنا کرنا پڑرہا ہے۔
عوام کی بار بار کی شکایت کے باوجود بھی انتطامیہ کی جانب سے کوئی توجہ نہیں دی جارہی ہے اگر حالات ایسے ہی رہیں تو حفظان صحت کے فقدان کی وجہ سے کئی طرح کی نت نئی بیماریاں پیدا ہو سکتی ہیں۔
