ریاست مہاراشٹر کے ضلع اورنگ آباد میں کورونا وبا کی وجہ سے کئی سارے اسکول بند رہے، لیکن مرزا لائبریری مشن کے ذریعے بچوں نے اپنے علاقے و محلے میں یوم اساتذہ مناکر اپنے اساتذہ کا شکریہ ادا کیا۔ اس موقع پر طلبا و طالبات نے قوم کے معماروں کی خدمات کو یاد کرتے ہوئے تعلیم کی اہمیت و افادیت پر روشنی ڈالی۔
یوم اساتذہ کے موقع پر مریم مرزا لائبریری مشن کے تحت بائیجی پورہ علاقے میں ایک پروگرام منعقد کیا گیا۔ اس پروگرام میں بچوں نے ماہر تعلیم ڈاکٹر سروپلی رادھا کرشنن، سر سید احمد خان، میزائل مین اور معروف دانشور ڈاکٹر اے پی جے عبدالکلام کی خدمات پر روشنی ڈالی۔ طلبا و طالبات نے منفرد انداز میں تعلیم کی اہمیت و افادیت کو اجاگر کیا۔ پروگرام میں سب سے بہترین تقریر کرنے والی طالبہ صفیہ قیصر کو انعام سے نوازا گیا۔
مزید پڑھیں:سائنسداں طوبی کا پیغام: تعلیم سے ہی بہتر مستقبل طے ہوتا ہے
پروگرام میں شامل تمام طلبا و طالبات کو این سی پی یو ایل کا رسالہ 'بچوں کی دنیا' تقسیم کیا گیا۔ طلبا و طالبات کا کہنا ہے کہ اس رسالے کے ذریعے انھیں کافی معلومات حاصل ہورہی ہیں اور وہ اپنے بڑوں کو بھی اس سے واقف کروارہے ہیں۔
