اس سلسلے میں مہاراشٹر پردیش کانگریس کمیٹی نے مقامی صدر کو وجہ بتاؤ نوٹس جاری کرتے ہوئے تین دن میں پورے معاملے میں تحریری وضاحت طلب کی ہے۔
کانگریس کے ریاستی صدر بالا صاحب تھورات کے حوالے سے پردیش سکریٹری گنیش پاٹل نے بھیونڈی کے مقامی صدر شعیب اشفاق خان کو وجہ بتاؤ نوٹس جاری دیا ہے۔
انہوں نے نوٹس میں مقامی صدر پر الزام عائد کیا ہے کہ کانگریس پارٹی اپنے کارپوریٹرز کو سنبھالنے میں ناکام ہوئی ہے جس کی وجہ سے میئر کے الیکشن میں پارٹی کے 18 کارپوریٹرز نے پارٹی کی امیدوار کے خلاف ووٹنگ کرکے پارٹی کا نقصان کیا ہے۔
کانگریس پارٹی نے اس شکست اور بغاوت کے لیے کانگریس کے مقامی صدر کو ذمہ دار ٹھہراتے ہوئے تین دن میں جواب طلب کیا ہے۔ اگر وہ معینہ مدت میں جواب نہیں دیتے ہیں تو ان کے خلاف کارروائی کرنے کا انتباہ دیا گیا ہے۔
اس سلسلے میں نمائندہ ای ٹی وی نے مقامی صدر شعیب اشفاق خان کے موبائل فون پر متعدد مرتبہ رابطہ قائم کیا مگر انہوں نے فون نہیں اٹھایا۔
