اورنگ آباد: ریاست مہاراشٹر کے اورنگ آباد شہر میں غریبوں اور ٹھیلے والوں کی مدد کے لیے پردھان منتری سواندھی یوجنا شروع کی گئی ہے اس اسکیم کے معرفت غریب عوام کو ذاتی چھوٹا موٹا کاروبار شروع کرنے کیلئے قرض کی فراہم کے لیے بینک آگے آئیں اس طرح کی اپیل مرکزی وزیر مملکت برائے خزانہ ڈاکٹر بھاگوت کراڑ نے کی۔ مرکزی وزیر مملکت برائے خزانہ ڈاکٹر بھاگوت کراڑ نے سنت ایکنا تھ رنگ مندر میں پی ایم سواندھی مہوتسو کے تحت اسکیم کے اہل افراد کو قرض فراہم کیے۔ اس موقع پر ایس بی آئی کے ڈپٹی جنرل منیجر روی کمار درما، میونسپل کارپوریشن کے ایڈیشنل کمشنر رویندر نیمک، راہل سوریه ونشی، ڈپٹی کلکٹر رامیشور روڈگے، ضلع پریشد کے اشوک کائندے، انتظامی افسر رو ہیداس دور کولکر اور دیگر موجود تھے۔
پروگرام سے خطاب کرتے ہوئے ڈاکٹر کراڑ نے کہا کہ اگر دیہی اور شہری علاقوں کے لوگوں کو مالی طور پر مضبوط کیا جائے تو ملک کی معیشت میں تیزی آئے گی، انھوں نے کہا کہ پردھان منتری سواندھی یوجنا کے ذریعے غریب لوگوں کو کاروباری فنڈ فراہم کرنے کیلئے بینکوں کی پہل اہم ہوگی۔ کراڑ نے کہا کہ وزیر اعظم نریندرمودی کی رہنمائی میں ملک میں مختلف اسکیموں کو مؤثر طریقے سے نافذ کیا جا رہا ہے۔ لہذا جن شہریوں کے بینک اکاؤنٹس نہیں ہیں ان کے اکاؤنٹ کھولنے، بیمہ اسکیم کے فوائد عام لوگوں تک پہنچانے اور جو لوگ مالی امداد سے محروم ہیں انھیں امداد دستیاب کرانے کی کوششیں کی جارہی ہیں۔ میونسپل علاقوں میں ہاکروں کو مرکزی اسکیم کا فائدہ پہنچانے اور اس بارے میں بیداری بڑھانے کیلئے متعلقہ اداروں کو پہل کرنے پر بھی انھوں نے زور دیا۔
کراڑ نے بتایا کہ اگر ہاکرس کے بینک اکاؤنٹ، آدھار اور میونسپل کارپوریشن میں رجسٹریشن ہے تو انہیں سیلف فنڈ اسکیم کا فائدہ دیا جائے گا۔ پہلے 10 ہزار روپے قرض اور وقت پر ادائیگی پھر 20 ہزار اور پھر 50 ہزار روپے قرض دیا جائے گا۔ یہ اسکیم پھل فروشوں، سبزی فروشوں کے ساتھ ساتھ ہاکروں اور چھوٹے تاجروں کی خاندانی معیشت میں اہم ثابت ہونے کا دعوی بھی انھوں نے کیا۔ انہوں نے بینکوں سے بھی اپیل کی کہ وہ پردھان منتری سواندھی یوجنا کے فوائد شہری علاقوں کے ساتھ ساتھ دیہی علاقوں تک پہنچانے کیلئے کام کریں اور ضرورت مند شہری اس اسکیم کا فائدہ اٹھائیں۔ ملک میں تقریباً 49 کروڑ جن دھن اکا ؤنٹس کھولنے کے ساتھ ساتھ، ان کھاتوں کے ساتھ آدھار اور موبائل لنک کرائے جس کے سبب کسانوں کے کھاتوں میں براہ راست امداد پہنچانا ممکن ہوا۔
انہوں نے یہ بھی کہا کہ حکومت پردھان منتری آیوشمان بھارت یوجنا، اجولا گیس یوجنا سمیت مختلف اسکیموں کے ذریعے عام آدمی کی مدد کرنے کی کوشش کر رہی ہے۔ پروگرام کے آغاز میں ایس بی آئی کے ڈپٹی جنرل منیجر روی کمار ور ما نے پی ایم سواندھی مہوتسو کے تحت مستفیدین کو قرض کی تقسیم کے بارے میں معلومات دی۔ میونسپل کارپوریشن کے ایڈیشنل کمشنر رنجیت پاٹل نے میونسپل کارپوریشن کی جانب سے پی ایم سواندھی مہوتسو کے تحت مستحقین کو قرض کی تقسیم کے سلسلے میں جاری کارروائی کے بارے میں بتایا۔
یہ بھی پڑھیں :Crops Damaged Due To Hailstorm ژالہ باری سے جالنہ کے کسانوں کی فصلیں برباد، حکومت سے معاوضے کا مطالبہ
