کورونا کی وباء نے انسانی زندگی کو اتھل پتھل کرکے رکھ دیا ہے، ہر کوئی تنہائی کا شکار ہے ایسےمیں تصور کیجیے اُس خاتون کے بارے میں جو کورونا کی مریض ہے اور اس نے ایک بچی کو جنم دیا لیکن اسے دیکھ نہیں سکتی کیوں کہ خاتون کورونا مثبت ہونے کے سبب دوسرے وارڈ میں ہے۔
تا ہم ڈاکٹرز نے زچہ اور بچہ ان دونوں کی ملاقات کا بہترین حل نکالا اور ویڈیو کال کے ذریعے خاتون کو اس کی نوزائیدہ بچی دکھائی گئی۔
یہ لمحہ ایک ماں کے لیے کسی عذاب سے کم نہیں، ڈاکٹروں کے لیے بھی یہ منظر کافی درد بھرا تھا لیکن مجبوری کے تحت ایسا کیا گیا۔
اس کے بعد ڈاکٹرز نے ترکیب نکالی کہ ویڈیو کال کے ذریعے ماں کو بیٹی سے ملوایا جائے اور ان کی یہ کوشش کارگر ثابت ہوئی، ویڈیو کال کے ذریعے ہی ماں نے اپنی بچی کا دیدار کیا
حیرت انگیز بات یہ تھی کہ جب نوزائیدہ نے ماں کو دیکھا اور اس آواز سنی تو اس میں نئی جان آگئی اور حرکت کرنے لگی۔
کورونا کے مرض میں مبتلا خاتون کا تعلق ممبئی سے ہے وہ بیٹی کی پیدائش کے لیے مائیکے اورنگ آباد آئی تھی لیکن یہاں پہنچنے کے بعد طبی جانچ میں یہ پتہ چلاکہ حاملہ خاتون کووڈ 19 سے متاثر ہے اس کے بعد سے ہی گھاٹی دواخانے میں اس خاتون کا علاج جاری ہے۔
