اورنگ آباد: انٹرنیشنل اسپورٹس یونیورسٹی منتقل ہونے کے خلاف ایم آئی ایم کا احتجاج

ریاست مہاراشٹر کے ضلع اورنگ آباد میں مجلس اتحاد المسلمین کے کارکنان نے انٹرنیشنل اسپورٹس یونیورسٹی کے قیام سے قبل ہی اچانک پونہ منتقل کیے جانے کے خلاف ضلع کلکٹر دفتر کے سامنے احتجاج کیا۔ ایم آئی ایم کے کارکنان کا کہنا ہے کہ مراٹھواڑہ کے ساتھ ایک بار پھر نا انصافی ہوئی ہے۔

اورنگ آباد میں موجود انٹرنیشنل اسپورٹس یونیورسٹی کے قیام سے پہلے ہی پونہ شہر منتقل ہو نے سے مراٹھواڑہ کے اسپورٹ شائقین کو مایوسی ہوئی ہے۔

مجلس اتحاد المسلمین کے رکن پارلیمان سید امتیاز جلیل نے اس معاملے پر حکمراں جماعت شیوسینا پر شدید نکتہ چینی کی۔ انہوں نے الزام عائد کیا کہ شیوسینا این سی پی کے سامنے گھٹنے ٹیک چکی ہے، یہی وجہ ہے کہ مراٹھواڑہ کے ساتھ ایک بار پھر نا انصافی ہوئی ہے۔ امتیاز جلیل کے اس بیان کے بعد ایم آئی ایم کے کارکنان نے یونیورسٹی کی منتقلی کے خلاف احتجاج کیا۔

اس احتجاج میں اسپورٹس سے جڑے لوگوں نے بھی شرکت کی۔ اس موقع پر حکومت مخالف نعرے بازی کی گئی اور سیاسی دباؤ کے تحت یونیورسٹی کو منتقل کرنے کا الزام عائد کیا گیا۔