ریاست مہاراشٹر کے ضلع اورنگ آباد میں مشہور بالی ووڈ اداکار دلیپ کمار کی صحت یابی کے لئے جن جاگرن سمیتی کی جانب سے دعاؤں کا اہتمام کیا گیا ۔دلیپ کمار نے اپنی فلموں کے ذریعے باہمی اتحاد اور سماجی اصلاح کا پیغام دیا اور ہمارے ملک میں گنگا جمنی تہذیب کے علم بردار رہے۔
شہنشاہ جذبات و مقبول اداکار دلیپ کمار کی صحت یابی کے لئے اورنگ آباد میں دعائیں کی گئی۔اس موقع پر جن جاگرن سمیتی کے صدر محسن احمد کا کہنا ہے کہ دلیپ کمار نے اپنے دور میں مقبول فلموں کے ذریعے باہمی اتحاد اور سماجی اصلاح کا پیغام دیا ہے۔
انہوں نے کہا ہے کہ دلیپ کمار ہمارے ملک میں گنگا جمنی تہذیب کے علم بردار ہیں، اپنے وقت کا مقبول اداکار زندگی کی جنگ لڑ رہا ہے، اس لیے ان کی صحت یابی کے لیے خصوصی دعاؤں کا اہتمام کیا گیا ہے۔ اس موقع پر کورونا سے متاثرہ افراد کی صحت یابی کے لئے بھی دعائیں کی گئیں۔
واضح رہےکہ بھارت کے مشہور و معروف اداکار دلیپ کمار کی صحت خراب ہونے کی وجہ سے انہیں 6 جون کو ممبئی کے کھار علاقے میں واقع ہندوجا ہسپتال میں داخل کرایا گیا تھا۔ انہیں سانس لینے میں دقت پیش آرہی تھی۔ وہیں، ڈاکٹروں نے انہیں بائیلیٹرل پلیورل وفیوژن سے متاثر پایا ہے۔اس وقت وہ ہسپتال کے نان کووڈ وارڈ میں زیر علاج ہیں۔
دلیپ کمار کے ٹویٹر ہینڈل سے ایک ٹویٹ میں کہا گیا ہے 'ڈاکٹر نتن گوکھالے اور ان کی ٹیم دلیپ کمار کا علاج کر رہی ہے۔ عوام سے درخواست ہے کہ ان کی صحتیابی کے لیے دعا کریں'۔
