ریاست مہاراشٹر کے شہر اورنگ آباد میں جعلی الیکشن کارڈ بنانے والے گروہ کا پولیس نے پردہ فاش کیا ہے۔
اورنگ آباد میں واقع ماتوشری ڈیجیٹل نام کی دکان پر چھاپہ مار کر جعلساز گروہ کو دھر دبوچا گیا۔ پنڈلک نگر پولیس نے اس معاملے میں دو افراد کو گرفتار کر کے کمپیوٹر اور دیگر سامان ضبط کیا ہے۔
ماتوشری ڈیجیٹل دکان کے نام پر جعلی الیکشن کارڈ بنانے والے گروہ کا اورنگ آباد پولیس نے پردہ فاش کرنے کا دعوی کیا ہے۔ پولیس نے پنڈلک نگر علاقے میں ماتوشری ڈیجیٹل نامی دکان پر چھاپہ مار کر دکان مالک اور اس کے ملازم کو گرفتار کیا ہے۔ ملزمین کے قبضے سے کمپیوٹر، سی پی یو، پرنٹر، اسکینر اور دیگر سامان ضبط کیا گیا ہے۔
پولیس کا کہنا ہے کہ تحصیلدار کی اطلاع پر اور خفیہ معلومات کی بنا پر ایک فرضی گاہک کو بھیج کر جب اس بات کی تصدیق ہوگئی کہ اس دکان میں جعلی الیکشن کارڈ تیار کیے جارہے ہیں تو ملزمین کے خلاف کارروائی کی گئی۔ اس معاملے میں اور کون کون ملوث ہیں، اس بات کی تفتیش کی جارہی ہے۔
ملزمین کے خلاف پنڈلک نگر پولیس اسٹیشن میں معاملہ درج کیا گیا ہے۔ یہ معاملہ کب سے چل رہا تھا اور کتنے لوگوں کے جعلی الیکشن کارڈ بنائے گئے ہیں، اس کی جانچ بھی کی جارہی ہے۔
