گزشتہ روز ایم آئی ایم کے سربراہ اسد الدین اویسی نے شہر میں انتخابی مہم کے دوران پارٹی کے انتخابی نشان پتنگ اڑانے کا عملی مظاہرہ کیا تھا اور ان کے رقص کا ویڈیو تیزی سے وائرل ہو رہا ہے جبکہ ایم آئی ایم سربراہ نے اسے گمراہ کن پروپگنڈے سے تعبیر کیا۔
دوسری جانب اورنگ آباد میں ایم آئی ایم امیدواروں کی مقبولیت میں زبردست اضافہ دیکھا جارہا ہے۔
مہاراشٹر اسمبلی چناؤ میں ایم آئی ایم ایک اہم پارٹی کے طور پر ابھری ہے یہی وجہ ہے کہ ایم آئی ایم کے سربراہ اسد الدین اویسی سے منسلک ہر پہلو کو میڈیا اپنے انداز میں پیش کررہا ہے۔
شہر کے آزاد چوک میں ہوئے انتخابی جلسے میں اسد الدین اویسی نے پتنگ اڑانے کے طریقے کا عملی مظاہرہ کیا تو اسے الگ طریقے سے پیش کیا جا رہا ہے، لیکن اس پورے معاملے پر خود ایم آئی ایم سربراہ نے اپنی جانب سے وضاحت کی۔
انہوں نے کہا کہ میرے رقص پر کسی نے الگ سے کوئی گانا لگا دیا ہے۔
انتخابی مہم کے آخری مرحلے میں اسد الدین اویسی نے اورنگ آباد مشرقی اسمبلی حلقے کا پیدل دورہ کیا اور پارٹی کے حق میں ووٹ کی اپیل کی، بارش ہونے کے باوجود ایم آئی ایم کی مہم جاری رہی اس دوران اسد الدین اویسی نے سب سے ووٹ کی اپیل کی۔
واضح رہے کہ اورنگ آباد شہر میں تین اسمبلی حلقے ہیں، ان تینوں حلقوں میں شیوسینا بی جے پی اتحاد اور ایم آئی ایم کے درمیان راست مقابلہ ہونے کا امکان ہے یہی وجہ ہے کہ انتخابی مہم کے آخری روز دونوں جماعتوں کی جانب سے ایڑی چوٹی کا زور لگایا گیا۔
