مہاراشٹر کے دارالحکومت ممبئی سے متصل پاورلوم صنعتی شہر بھیونڈی کے پرشو رام ٹاورے اسپورٹس اسٹیڈیم میں کل ہند مجلس اتحادالمسلمین کے صدر اور رکن پارلیمان اسدالدین اویسی جمعرات کی شام شہریت ترمیمی قانون، این آر سی اور این پی آر کی مخالفت میں ایک جلسہ عام کو خطاب کرنے والے تھے۔
تمام تیاریاں ہوچکی تھی مگر بھیونڈی شہر پولیس نے اس جلسے کی اجازت موجودہ صورتحال کے پیش نظر نہیں دی جس کی وجہ سے یہ جلسہ رد ہوگیا ہے۔
گزشتہ کئی دنوں سے اس پروگرام کی تیاریاں ہورہی تھیں مگر گذشتہ شب مقامی ڈپٹی پولیس کمشنر راجکمار شندے نے میڈیا اہلکاروں کو اپنے وہاٹس ایپ گروپ کے ذریعہ بتایا کہ 'ایم آئی ایم کی ہونے والی تقریب رد کردی گئی ہے۔'
اس بات کی تصدیق ریاستی صدر اور رکن پارلیمان امتیاز جلیل نے اپنے ٹویٹ میں کی ہے۔
واضح رہے کہ بھیونڈی کے پرشورام ٹاورے اسٹیڈیم میں اس پروگرام کی تیاریاں مکمل ہوچکی تھیں اور شام 6 بجے اس اسدالدین اویسی شرکت کرنے والے تھے مگر اس سے قبل بھیونڈی کی بھوئیواڑہ پولیس نے مقامی صدر کو 149 کا نوٹس جاری کرتے ہوئے کہاکہ 'پولیس سے اجازت طلب کی گئی مگر موجودہ حالات کو دیکھتے ہوئے اسے ابھی نہ کرتے ہوئے بعد میں کریں۔'
