مالیگاؤں میں بچوں کی گمشدگی کیلئے کام کرنے والی ایک غیر سرکاری تنظیم کے مطابق رواں برس شہر میں بچوں کے گمشدہ ہونے کے واقعات میں تیزی سے اضافے ہوا ہے۔ جس کی روک تھام کے لیے پولیس انتظامیہ اس معاملے میں سنجیدگی کا مظاہرہ کررہی ہے۔
گزشتہ روز پوارواڑی پولیس اسٹیشن کی حدود میں ایک بچی کو اغواء کرنے کی کوشش کی گئی تھی۔ اس تعلق سے اس بچی کے والد نے پوارواڑی پولیس اسٹیشن میں نامعلوم نوجوان کے خلاف شکایت درج کروائی کہ مذکورہ تاریخ کو ایک نامعلوم نوجوان نے ان کی بچی کو گھر کے پاس سے شیرینی کا لالچ دے کر اغواء کرنے کی کوشش کی ہے۔ اور اس بات کی خبر ان کو اطراف کے کارخانہ میں لگے سی سی ٹی وی کیمرے کے ذریعے حاصل ہوئی ہے۔جس میں صاف طور پر نظر آرہا کہ ایک نوجوان مٹھائی کا لالچ دے کر بچی کو اپنے ساتھ لے جانے کی کوشش کررہا ہے۔ اس معاملے میں پولیس نے نامعلوم ملزم کے خلاف دفعہ 363 کے تحت اغواء کا مقدمہ درج کر کے تلاشی مہم شروع کردی ہے۔
اس نامعلوم نوجوان کا کوئی سراغ نہ ملنے پر پوارواڑی پولیس نے اس ملزم کا پتہ بتانے والوں کو یا اس کے متعلق معلومات دینے والوں کو 10 ہزار روپیہ نقد رقم دینے کا اعلان کیا ہے۔ اس تعلق سے پوارواڑی پولیس اسٹیشن کے انچارج پی آئی وسنت بھوئے شہریان سے اپیل کی کہ اگر کسی شہری کو یہ نوجوان نظر آئے یا اس کے تعلق سے کسی طرح کی معلومات ملے تو فوراً دیے گئے نمبرات پر رابطے کریں۔اور معلومات دینے والے کا نام خفیہ رکھا جائے گا۔
پی آئی وسنت بھوئے : 9011109444
